जळगाव, दि.२५ – जिल्हा उद्योग केंद्राच्या अंतर्गत लघु व मध्यम उद्योगांकरिता युवकांना त्यांनी सादर केलेल्या प्रकल्पावर बँकेच्या मार्फत कर्जाची सुविधा उपलब्ध करून नवीन उद्योग धंदा सुरू करण्यासाठी मदत करण्यात येते. मात्र युवक हे प्रकल्प घेऊन कर्जाच्या सुविधे करता बँकेकडे धाव घेतात, तेव्हा मात्र त्यांच्या पदरामध्ये निराशा पडत असून जिल्हा उद्योग केंद्राने मंजूर केलेले प्रकल्प बँक मात्र विविध अटी शर्तीच्या पूर्ततेसाठी ते नामंजूर करत असल्याचा आरोप युवक काँग्रेसतर्फे करण्यात आला.
दरम्यान जळगाव जिल्हा युवक काँग्रेसच्या वतीने जिल्हाध्यक्ष देवेंद्र मराठे यांच्या नेतृत्वात जिल्हा उद्योग केंद्राचे व्यवस्थापक आर. आर. डोंगरे यांच्यासोबत या प्रश्नासंदर्भात चर्चा केली व त्यांना निवेदन देण्यात आले. यावेळी युवक काँग्रेसचे पदाधिकारी कार्यकर्ते उपस्थित होते.
जिल्हा उद्योग केंद्र व बँक याच्यामध्ये आपण योग्य समन्वय साधावा जेणेकरून आपण मंजूर केलेल्या प्रकल्पावरती बँकेमार्फत कर्जाची सुविधा का उपलब्ध होत नाही..? या गोष्टींची गांभीर्यपूर्वक दखल घेत जिल्हाधिकारी महोदयांशीदेखील आपण चर्चा करून जिल्हा उद्योग केंद्राच्या मार्फत मंजूर झालेल्या प्रकल्पांना बँकेने कर्ज सुविधा दिलीच पाहिजे अशी मागणी केली.
दरम्यान मागणीची पूर्तता न झाल्यास जळगाव जिल्हा युवक काँग्रेसच्या वतीने रस्त्यावरती उतरून या बेरोजगार युवकांच्या रोजगारासाठी आंदोलन करण्यात येईल असा इशारा देण्यात आला.