जळगाव, दि.१५ – येथील वैद्यकीय महाविद्यालयामध्ये दर बुधवारी जिल्ह्यातील दिव्यांग बांधवांची तपासणी केल्यानंतर त्यांना दिव्यांगत्व प्रमाणपत्र तातडीने देण्याची नियमावली असताना तीन ते चार महिन्यांची पुढील तारीख दिली जात असल्याची तक्रार महाराष्ट्र नवनिर्माण सेनेच्या वतीने बुधवारी करण्यात आली. दरम्यान महाविद्यालयाचे अधिष्ठाता डॉ. गिरीश ठाकूर व जिल्हा रुग्णालयाचे शल्यचिकित्सक डॉ. किरण पाटील यांच्याशी संपर्क साधून दिव्यांग बांधवांना न्याय द्यावा याकरता महाराष्ट्र नवनिर्माण सेनेचे जिल्हाध्यक्ष ॲड.जमील देशपांडे यांच्यासह मनसे पदाधिकारी यांनी चर्चा केली.
एकीकडे शासन दिव्यांग मंत्रालय बनवण्याच्या घोषणा करत असून दुसरीकडे दिव्यांग बांधवांना तारीख पे तारीख देऊन प्रताडीत केले जात आहे. बुधवारी येणाऱ्या दिव्यांग बांधवांना शासकीय महाविद्यालयाकडून अगोदरच तारीख टाकून ठेवलेले टोकन विचारीत केले जातात. सदर टोकन पद्धती तातडीने बंद करावी असा इशारा महाराष्ट्र नवनिर्माण सेनेने दिलेला आहे. जिल्ह्यातील ज्या बांधवांना दोन-तीन महिने पुढील तारखा मिळालेले आहेत त्या सर्वांना घेऊन महाराष्ट्र नवनिर्माण सेना अतिशय आक्रमक पद्धतीने आंदोलन करणार असल्याची माहिती महाराष्ट्र नवनिर्माण सेनेचे जिल्हाध्यक्ष ॲड.जमील देशपांडे यांनी दिली.
याप्रसंगी महाराष्ट्र नवनिर्माण सेनेचे शहर अध्यक्ष किरण तळले, उपशहर अध्यक्ष ललित शर्मा, सतीश सैंदाणे, चेतन पवार, राजेंद्र निकम, साजन पाटील, प्रशांत बाविस्कर, किरण सपकाळ, खुशाल ठाकूर आदींसह पदाधिकारी, कार्यकर्ते उपस्थित होते.