जामनेर, दि.२६ – डॉ एपीजे अब्दुल कलाम इंटरनॅशनल फाऊंडेशन, हाऊस ऑफ कलाम, रामेश्वरम, तामिळनाडू येथील संस्थेच्या महाराष्ट्र राज्य समन्वयक पदी मनीषा चौधरी यांची पुन्हा नियुक्ती करण्यात आली. कलाम यांचे विचार विद्यार्थ्यांपर्यंत पोहचविण्याचे कार्य आणि स्वप्नातील विकसित राष्ट्र घडविण्याचे कार्य संस्थे तर्फे केले जाते.
२०१६ पासून मनीषा चौधरी या संस्थेचे काम महाराष्ट्रात करीत असून या वर्षी त्यांना परत काम करण्यासाठी संधी संस्थे तर्फे देण्यात आली. १५ ऑक्टोबर ला कलाम यांच्या जयंती निमित्त महाराष्ट्रभर शाळा आणि कॉलेज मध्ये विद्यार्थ्यांचा सर्वांगीण विकास, कुशल बुद्धी, आणि कला गुणांना वाव देण्यासाठी विविध उपक्रम या संस्थेतर्फे मोफत राबविले जातात.
राष्ट्रीय स्तरावर चित्रकला स्पर्धा, वक्तृत्व स्पर्धा, विज्ञान आणि तंत्रज्ञानाचे प्रत्यक्ष काम करणारे मॉडेल्स अश्या विविध स्पर्धां मध्ये जास्तीत जास्त शाळांनी सहभाग नोंदवावा असे आवाहन मनीषा चौधरी यांचे कडून करण्यात आले, राष्ट्रीय स्तरावरील या सर्व स्पर्धा मोफत असून विजयी विद्यार्थ्यांना कलाम कुटुंबियांकडून प्रशस्ती पत्रे दिले जातील.
