जळगाव, दि.३१ – कवियीत्री बहिणाबाई चौधरी उत्तर महाराष्ट्र विद्यापिठात अनेक वर्षापुर्वी छत्रपती शिवाजी महाराज अध्यासन केंद्र स्थापन करण्यात आले आहे. त्या माध्यमातून छत्रपती शिवाजी महाराज यांच्या जिवनावर अभ्यास करणे तसेच त्यांचे विचार, आचारांचा प्रचार व प्रसार करणे, त्यांच्या कार्यपद्धतीवर संशोधन करणे, डॉक्युमेन्टरी तयार करणे वगैरे याबाबत कार्य होणे गरजेचे होते. मात्र गेल्या अनेक वर्षांपासून सदर अध्यासन केंद्राद्वारे कोणतेही कामकाज झालेले नाही किंवा होत नसल्याची तक्रार महाराष्ट्र नवनिर्माण सेनेच्या वतीने होत आहे.
दरम्यान कवयित्री बहिणाबाई चौधरी उत्तर महाराष्ट्र विद्यापीठाचे कुलगुरू डॉक्टर माहेश्वरी यांची मंगळवारी महाराष्ट्र नवनिर्माण सेनेच्या वतीने जिल्हाध्यक्ष एडव्होकेट जमील देशपांडे यांनी भेट घेऊन निवेदन दिले.
विद्यापीठात छत्रपती शिवाजी महाराज अध्यासन केंद्राद्वारे ज्यांना काम करण्याची इच्छा असेल त्यांच्या करीता विद्यापिठामध्ये स्वतंत्र कक्ष, कर्मचारी वर्ग व आर्थिक तरतुद केल्यास अध्यासन केंद्र चांगल्या प्रकारे कार्यान्वीत होऊ शकेल व छत्रपती शिवाजी महाराजांच्या कार्याला उजाळा मिळू शकेल, नव संशोधन करणाऱ्या विद्यार्थ्यांना पण छत्रपती शिवाजी महाराज सारख्या थोर राजांचे कर्तृत्व जगासमोर दाखविण्याची संधी मिळेल.
दरम्यान विद्यापीठाचे कुलगुरू डॉक्टर माहेश्वरी यांना या संदर्भात निवेदन देण्यात आले. विद्यापिठाने तातडीने निर्णय घ्यावा व जळगांव, धुळे, नंदुरबार या तिनही जिल्ह्यात छत्रपती शिवाजी महाराज अध्यासन केंद्राचे कक्ष सुरू करावे, अशी मागणी मनसेचे जिल्हाध्यक्ष जमिल देशपांडे यांनी केली. दरम्यान कुलगुरूनी सकारात्मक प्रतिसाद दिला असून अध्यासन केंद्र उत्तम काम करेल अशी ग्वाही देशपांडे यांना दिली.
