अमळनेर, दि. ०१ – तालुक्यातील अमळनेर महिला मंच ट्रस्टच्या वतीने शहरातील कचरा विघटन डेपोतील कर्मचारी महिला आणि पुरुष यांना शुक्रवारी सनकोट आणि डोक्याला बांधायचे रुमाल वाटप करण्यात आले. सोबतच येथील पूर्ण प्रकल्पाची संपूर्ण माहिती मंचच्या महिला सदस्यांनी जाणून घेतली.
या प्रकल्पात संपूर्ण शहरातील ओला आणि सुका कचरा आणला जातो. येथील कर्मचारी महिला दिवसभर ऊन्हात कचऱ्याचे विलगीकरण करण्याचे काम करतात. यासाठी त्यांना सनकोट आणि रुमाल वाटप करण्याचा उपक्रम महिला मंचच्या माध्यमातून करण्यात आला. यावेळी येथील सर्व कर्मचाऱ्यांना अल्पोपहार मंचच्या वतीने देण्यात आला.
या उपक्रमाची संकल्पना ट्रस्टच्या सदस्यांसह अध्यक्षा डॉ. अपर्णा मुठे यांच्या मनात आली आणि काही दानशूर महिला सदस्यांनी या उपक्रमास साथ दिल्यामुळे उपक्रम यशस्वी झाला. यावेळी महिला मंच ट्रस्टच्या उपाध्यक्षा तिलोत्तमा पाटील, खजिनदार कांचनभाभी, करुणा सोनार, विद्या हजारे, माधुरी पाटील, पद्मजा पाटील, विजया देसर्डा, भावना जीवनानी, अलका गोसावी, पूजा शहा, वासंती पाटील, शर्मिला बडगुजर, मेघा कुलकर्णी, चंदा वैद्य, सुरेखा पाटील आदी उपस्थित होत्या.
