लालसिंग पाटील | भडगाव, दि.१४ – कजगाव येथील कनाशी रस्त्यावरील शेतातून गेलेल्या विजेच्या तारेमुळे अचानक आग लागल्याने शेतकऱ्यांची एकच धावपळ उडाली. कजगाव येथील शेतकरी शैलेंद्र तकतसिंग पाटील यांच्या शेतात सोमवारी हा प्रकार घडला.
दरम्यान शेतालाच लागून विजेचा ट्रान्सफर्मर आहे. तेथून गेलेल्या विजेच्या तारेमुळे शॉर्टसर्किट होऊन त्याठिकाणी ठिणग्या पडल्याने खालील गवताने पेट घेतला. वेळीच शेतकऱ्यांनी आग विझवली. शेताला लागूनच ट्रान्सफर्मर असल्याने तेथील एका शेतात तब्बल पाच हजार केळीची लागवळ केली आहे. मात्र अचानक झालेल्या प्रकारामुळे शेतकऱ्यांनी तीव्र चिंता व्यक्त केली. जर वेळीच शेतकरी घटनास्थळी पोहचले नसते तर शेतकऱ्याचे मोठ्या प्रमाणावर नुकसान झाले असते. मात्र वेळीच काही शेतकऱ्यांनी समय सुचकता दाखवून आग विझवल्याने मोठा अनर्थ टळला असल्याचे शेतकऱ्यांनी बोलून दाखवले.
महिन्याभरातील दुसरी घटना..
दरम्यान यापूर्वीही गावातील स्टेशन रस्त्यावरील ट्रांसफार्मर जळाले होते. भर लोकवस्तीतील ट्रान्सफर्मर जळल्याने ग्रामस्थांनी तीव्र नाराजी व्यक्त केली होती. मात्र आता शेतातुन गेलेल्या विजेच्या तारेमुळे लागलेल्या आगीने शेतकरी भयभईत झाले आहेत. त्यामुळे महावितरणच्या उदासीन कारभाराविषयी नागरिकांनी नाराजी व्यक्त केली. वारंवार घडणाऱ्या घटनेनेकडे विजवितरण कंपनीने लक्ष घालावे अशी मागणी होत आहे.
