जळगाव, प्रतिनिधी : आजोबांच्या वर्षश्राद्धासाठी बहिणीला घेण्यासाठी जळगावकडे येत असलेल्या तरुणाच्या दुचाकीला समोरून भरधाव येणाऱ्या कंटेनरने जोरदार धडक दिली. या भीषण अपघातात दुचाकीस्वार ललित मनोहर झंवर (३०, मूळ रा. पाळधी, ता. धरणगाव, ह.मु. प्रेमनगर, जळगाव) यांचा जागीच मृत्यू झाला. रविवारी सायंकाळी सहाच्या सुमारास पाळधी-तरसोद बायपासवरील टाकळी फाट्याजवळ हा अपघात झाला.
ललित झंवर हे पिंप्राळा परिसरातील प्रेमनगर येथे कुटुंबासह राहत होते. त्यांच्या आजोबांचे ५ ऑक्टोबर रोजी वर्षश्राद्ध असल्याने कुटुंबातील सर्वजण मूळ गावी पाळधी येथे गेले होते. वर्षश्राद्धासाठी ललित यांची बहीण येणार असल्याने तिला घेण्यासाठी ते दुचाकीवरून जळगाव रेल्वेस्थानकाकडे निघाले होते.
पाळधीहून बायपासमार्गे जळगावकडे येत असताना टाकळी फाट्याजवळ समोरून येणाऱ्या कंटेनरने त्यांच्या दुचाकीला जोरदार धडक दिली. धडकेनंतर ललित रस्त्यावर फेकले गेले. नागरिकांनी त्यांना तातडीने शासकीय वैद्यकीय महाविद्यालय व रुग्णालयात दाखल केले. मात्र, डॉक्टरांनी तपासून त्यांना मृत घोषित केले.
अपघाताची माहिती मिळताच ललित यांचे नातेवाईक, मित्रपरिवार आणि परिचितांनी रुग्णालयात धाव घेतली. मृतदेह पाहताच नातेवाईकांनी एकच आक्रोश केला. आमदार राजूमामा भोळे तसेच माजी जिल्हा परिषद सदस्य प्रताप पाटील यांनीही रुग्णालयात भेट देत झंवर कुटुंबीयांचे सांत्वन केले.
महामार्गावरील उड्डाणपुलाचा भराव पहिल्याच पावसात खचल्याने गेल्या दीड महिन्यापासून दुरुस्तीचे काम सुरू आहे. त्यामुळे बायपासवर सध्या एकेरी वाहतूक सुरू असून, या मार्गावर अपघातांचे प्रमाण वाढल्याचे नागरिकांचे म्हणणे आहे. लहान-मोठे अपघात सातत्याने होत असल्याने या मार्गाच्या सुरक्षिततेचा प्रश्न पुन्हा ऐरणीवर आला आहे.
ललित झंवर हे कुटुंबातील एकुलते एक पुत्र होते. त्यांच्या अकाली आणि दुर्दैवी मृत्यूने झंवर कुटुंबीयांवर मोठे संकट कोसळले आहे. कुटुंबाचा आधार असलेल्या मुलाला गमावल्याने नातेवाईकांमध्ये शोककळा पसरली आहे. दरम्यान, महामार्ग दुरुस्तीचे काम पूर्ण होण्यास आणखी काही कालावधी लागणार असल्याने बायपासवरील वाहतूक सुरक्षित करण्यासाठी तातडीच्या उपाययोजना करण्याची मागणी नागरिकांकडून होत आहे.
