डोळ्यात मिरचीची पूड फेकून ३ लाख १५ हजारांची जबरी चोरी
भुसावळ : शहरातील टी.व्ही. टॉवर ग्राउंडसमोरील सार्वजनिक रस्त्यावर तीन अज्ञात इसमांनी मित आशिष कोटेचा (वय १९) आणि त्यांचे काका अजय कोटेचा यांच्या डोळ्यात मिरचीची पूड फेकून त्यांना रॉडने मारहाण केली. त्यानंतर बॅगेतील ३ लाख १० हजार रुपये रोख आणि ५ हजार रुपये किमतीचा विवो कंपनीचा मोबाईल असा एकूण ३ लाख १५ हजार रुपयांचा मुद्देमाल जबरदस्तीने हिसकावून आरोपी दुचाकीवरून पसार झाले.
ही घटना १७ ऑगस्ट २०२६ रोजी सकाळी सुमारे ७.४५ वाजता भुसावळ शहरातील टी.व्ही. टॉवर ग्राउंडसमोरील रस्त्यावर घडली.
फिर्यादी मित कोटेचा यांच्या तक्रारीनुसार, तीन अज्ञात इसमांपैकी एकाने त्यांच्या आणि त्यांचे काका अजय कोटेचा यांच्या डोळ्यात मिरचीची पूड फेकली. त्यामुळे दोघांना काही दिसेनासे झाले. याचा फायदा घेत आरोपींनी त्यांना मारहाण करून जवळील बॅगेतील ३ लाख १० हजार रुपयांची रोख रक्कम तसेच विवो कंपनीचा मोबाईल, ज्यामध्ये जिओ कंपनीचे सिमकार्ड होते, असा एकूण ३ लाख १५ हजार रुपयांचा ऐवज जबरदस्तीने हिसकावून घेतला. त्यानंतर आरोपी मोटारसायकलवरून घटनास्थळावरून फरार झाले.
या प्रकरणी १८ ऑगस्ट २०२६ रोजी दुपारी १.२७ वाजता भुसावळ बाजारपेठ पोलीस ठाण्यात गुन्हा क्रमांक ३८५/२०२६ नुसार भारतीय न्याय संहितेच्या कलम ३०९(६) व ३(५) अन्वये जबरी चोरीचा गुन्हा दाखल करण्यात आला आहे.
पोलिसांकडून तपास सुरू
गुन्ह्याचा पुढील तपास सहाय्यक पोलीस निरीक्षक राहुल तायडे करीत आहेत. गुन्ह्यातील तीनही अज्ञात आरोपींचा शोध घेण्यासाठी पोलिसांकडून तपास सुरू आहे.
