जळगाव, (प्रतिनिधी) : येथील नशिराबाद पोलीस ठाण्याच्या हद्दीत १३ वर्षीय अल्पवयीन मुलीला चिकू खाण्याचे आमिष दाखवून तिच्यावर अत्याचार केल्याची संतापजनक घटना समोर आली आहे. या प्रकरणी नशिराबाद पोलिसांनी ४३ वर्षीय आरोपीला तात्काळ बेड्या ठोकल्या असून, या घटनेमुळे परिसरात तीव्र संताप व्यक्त होत आहे.
मिळालेल्या माहितीनुसार, २० जुलै रोजी दुपारी ३ वाजेच्या सुमारास १३ वर्षीय पीडित मुलगी आपल्या घराजवळ खेळत असताना आरोपी सुनील अर्जुनराव सावके (वय ४३) याने तिला चिकू खाण्याचे आमिष दाखवून चिकूच्या बागेत नेले आणि तिच्यावर जबरदस्तीने अत्याचार केला.
या घटनेबाबत २१ जुलै रोजी सायंकाळी पीडित मुलीच्या आईने नशिराबाद पोलीस ठाण्यात फिर्याद दिली. फिर्यादीवरून नशिराबाद पोलिसांनी आरोपी सुनील सावके याच्याविरुद्ध पॉक्सो कायदा अंतर्गत गुन्हा दाखल करून त्याला तात्काळ अटक केली.
घटना उघडकीस येताच भुसावळ विभागाचे पोलीस उपविभागीय अधिकारी केदार बारबोले यांनी तात्काळ घटनास्थळी भेट देऊन पाहणी केली. या संपूर्ण कायदेशीर प्रक्रियेत आणि तपासात ‘ई-साक्ष’ प्रणालीचा (डिजिटल पुरावे) वापर करण्यात आला आहे. नशिराबाद पोलीस ठाण्याच्या प्रभारी अधिकारी सपोनि योगिता नारखेडे यांच्या मार्गदर्शनाखाली पोलीस उपनिरीक्षक विजय कोळी या प्रकरणाचा पुढील तपास करत आहेत.
