जळगाव, (प्रतिनिधी) : ‘नशामुक्त भारत’ अभियानांतर्गत जळगाव स्थानिक गुन्हे शाखा आणि जिल्हापेठ पोलिसांनी संयुक्तपणे एक मोठी धडक कारवाई केली आहे. छत्रपती शिवाजी महाराज पुतळ्यामागील शासकीय तांत्रिक विद्यालयाशेजारी असलेल्या जी.एस. ग्राउंडच्या प्रवेशद्वाराजवळ सापळा रचून ५६.२१ ग्रॅम वजनाचा ‘मेफेड्रोन’ (एम.डी.) हा अंमली पदार्थ जप्त करण्यात आला. याप्रकरणी दोन आरोपींना अटक करण्यात आली असून एकूण ३ लाख ६ हजार ५४० रुपयांचा मुद्देमाल जप्त करण्यात आला आहे.
पोलीस अधीक्षक श्रीकांत धिवरे आणि अपर पोलीस अधीक्षक संदीप गावीत यांच्या मार्गदर्शनाखाली वरिष्ठ पोलीस निरीक्षक राहुल गायकवाड यांच्या पथकाने १० जुलै रोजी पहाटेच्या सुमारास ही कारवाई केली. पोलिसांनी संशयास्पदरीत्या दुचाकीवरून आलेल्या आरोपींना थांबवण्याचा प्रयत्न केला असता, एकाने अंधाराचा फायदा घेऊन पळ काढला, तर दोघांना पोलिसांनी ताब्यात घेतले.
जयेष देविदास तायडे (वय २७, रा. हरी ओम नगर, जळगाव) आणि हितेंद्र शिवाजी परदेशी (वय ३१, रा. कांचन नगर, जळगाव) अशी अटक केलेल्या आरोपींची नावे आहेत. त्यांच्याकडून २ लाख ८१ हजार ५४० रुपये किमतीचे ५६.२१ ग्रॅम एम.डी. आणि २५ हजार रुपयांची मोटारसायकल (MH-19-DJ-0132) जप्त करण्यात आली आहे. प्राथमिक चौकशीत त्यांनी हा माल फरार आरोपी भय्या सोनवणे (रा. कांचन नगर) याच्याकडून विकण्यासाठी आणल्याची कबुली दिली असून, पोलीस त्याचा शोध घेत आहेत.
अटक करण्यात आलेल्या जयेष तायडे या आरोपीवर यापूर्वीही रामानंद नगर, जिल्हापेठ आणि जळगाव शहर पोलीस ठाण्यात विविध गंभीर गुन्हे दाखल आहेत. या प्रकरणी सर्व आरोपींविरुद्ध जिल्हापेठ पोलीस ठाण्यात एनडीपीएस कायद्यांतर्गत गुन्हा दाखल करण्यात आला आहे. परिसरामध्ये अंमली पदार्थांची विक्री किंवा वाहतूक होत असल्यास नागरिकांनी तात्काळ पोलिसांशी संपर्क साधावा, माहिती देणाऱ्याचे नाव गोपनीय ठेवले जाईल, असे आवाहन पोलीस अधीक्षक श्रीकांत धिवरे यांनी केले आहे.
