जळगाव, (प्रतिनिधी) : जळगाव विमानतळासमोरील कुसुंबा परिसरातून धानवड गावाकडे जाणाऱ्या कच्च्या रस्त्यावर एका इसमाकडे गावठी कट्टा असल्याची गोपनीय माहिती पोलीस उपनिरीक्षक चंद्रकांत धनके यांना मिळाली. या माहितीच्या आधारे एम.आय.डी.सी. पोलीस स्टेशनचे पोलीस निरीक्षक बबन आव्हाड यांच्या मार्गदर्शनाखाली तात्काळ एक विशेष पथक तयार करण्यात आले.
पथकाने घटनास्थळी जाऊन सापळा रचला असता, एक संशयित इसम पायी फिरताना दिसला. पोलिसांना पाहून त्याने पळून जाण्याचा प्रयत्न केला, मात्र सतर्क पोलीस पथकाने पाठलाग करून त्याला ताब्यात घेतले. चौकशी दरम्यान त्याने उडवाउडवीची उत्तरे दिल्याने त्याची रीतसर अंगझडती घेण्यात आली. या झडतीत त्याच्या पॅंटच्या मागील बाजूस, कमरेला खोचलेला २०,००० रुपये किमतीचा एक लोखंडी काळ्या रंगाचा गावठी कट्टा (मॅगझिनसह) मिळून आला.
पोलिसांनी दिलेल्या माहितीनुसार, गणेश श्रावण सोनवणे (वय २४ वर्षे, व्यवसाय-मजुरी, रा. कुसुंबा, ता. जि. जळगाव) असे अटक करण्यात आलेल्या आरोपीचे नाव आहे. याप्रकरणी जळगाव एम.आय.डी.सी. पोलीस स्टेशन येथे गुन्हा दाखल करण्यात आला आहे.
सदरची उल्लेखनीय कामगिरी पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत, उपविभागीय पोलीस अधिकारी नितीन गणपुरे यांच्या मार्गदर्शनाखाली पोलीस निरीक्षक बबन आव्हाड, पोलीस उपनिरीक्षक चंद्रकांत धनके, रमेश बाबूलाल चौधरी, रामकृष्ण पाटील, किरण पाटील, गणेश ठाकरे, सुभाष साळुंखे, रमाकांत साळुंखे, राहुल येथे, नितीन ठाकूर व शशिकांत मराठे यांच्या पथकाने केली आहे.
