जळगाव, (प्रतिनिधी) : मेहरूण येथील श्रीराम प्रभू ज्येष्ठ नागरिक संघाच्या वतीने गावातील आणि परिसरातील ज्येष्ठ नागरिकांचा वाढदिवस सामूहिकरीत्या साजरा करण्याचा एक स्तुत्य उपक्रम सुरू करण्यात आला आहे. या उपक्रमांतर्गत दुसऱ्या कार्यक्रमाचे आयोजन स्थानिक साईबाबा मंदिरात करण्यात आले होते, जेथे अतिशय उत्साही वातावरणात पाच ज्येष्ठ नागरिकांचा वाढदिवस साजरा करण्यात आला.
या सोहळ्यात वसंत आनंदा पाटील, अशोक शामराव वंजारी, श्रीमती शोभाबाई वंजारी, कल्पनाबाई ढाकणे आणि वासुदेव विठ्ठल सानप या ज्येष्ठ नागरिकांचा उपस्थित मान्यवरांच्या हस्ते सत्कार करून त्यांना वाढदिवसाच्या मनःपूर्वक शुभेच्छा देण्यात आल्या.
कार्यक्रमाच्या अध्यक्षस्थानी माजी नगरसेवक प्रशांत नाईक होते, तर प्रमुख पाहुणे म्हणून अशोक सिताराम लाडवंजारी व सुनील वसंत वंजारी उपस्थित होते. याप्रसंगी बोलताना मान्यवरांनी सांगितले की, “ज्येष्ठ नागरिकांचा सन्मान करणे ही संपूर्ण समाजाची जबाबदारी आहे. अशा प्रकारच्या आगळ्यावेगळ्या उपक्रमांमुळे समाजात आपुलकीची भावना निर्माण होऊन सामाजिक ऐक्य अधिक मजबूत होते.”
हा कार्यक्रम यशस्वी करण्यासाठी श्रीराम प्रभू ज्येष्ठ नागरिक संघाचे अध्यक्ष दिलीप लाडवंजारी, उपाध्यक्ष सोमनाथ सानप यांच्यासह रवींद्र सानप, उत्तमराव नेरकर, दत्तात्रय लाड, विनोद पाटील, भास्कर वंजारी, निवृत्ती महाजन, रवींद्र तायडे, अनिल महाजन, सुनील भालेराव, बाबुराव वाघ, गोविंदा वाघ, भास्कर महाजन, श्रीमती पुष्पाताई घुगे, भास्कर वाणी, अनिल चाटे, गजानन लाडवंजारी, अमर लाडवंजारी, नितीन चाटे, रघुनाथ कोल्हटकर आणि नारायण वाघ आदी सदस्यांनी विशेष परिश्रम घेतले.
या कार्यक्रमाला मेहरुण परिसरातील ग्रामस्थ आणि ज्येष्ठ नागरिक मोठ्या संख्येने उपस्थित होते. उपस्थित सर्वांनीच वाढदिवस असलेल्या ज्येष्ठांना त्यांच्या दीर्घायुष्यासाठी, तसेच निरोगी व आनंदी जीवनासाठी मनभरून सदिच्छा व्यक्त केल्या.
