जळगाव, (प्रतिनिधी) : तरुण वयात सेवाभावी वृत्तीने सामाजिक क्षेत्रात उत्कृष्ट कार्य करणाऱ्या युवकांना प्रोत्साहन देण्यासाठी महाराष्ट्र शासनाच्या वतीने दिला जाणारा ‘जिल्हास्तरीय युवा पुरस्कार’ यंदा पाचोरा येथील तरुण समाजसेवक कमलेश सोनवणे याला प्रदान करण्यात आला. महाराष्ट्र दिनाचे औचित्य साधून जळगाव येथील पोलीस परेड मैदानावर आयोजित मुख्य शासकीय ध्वजारोहण समारंभात पालकमंत्री गुलाबराव पाटील यांच्या हस्ते कमलेशला या मानाच्या पुरस्काराने सन्मानित करण्यात आले.
या सोहळ्याप्रसंगी जिल्हाधिकारी रोहन घुगे, जिल्हा परिषदेच्या मुख्य कार्यकारी अधिकारी करिश्मा नायर, पोलीस अधीक्षक श्रीकांत धिवरे, जिल्हा क्रीडा अधिकारी जगदीश चौधरी यांच्यासह प्रशासनातील वरिष्ठ अधिकारी व मान्यवर उपस्थित होते. कमलेश सोनवणेची ओळख एक अभ्यासू व्याख्याता आणि सक्रिय समाजसेवक म्हणून आहे. त्याने शिक्षण, आरोग्य, लिंग समानता, क्रीडा आणि पर्यावरण अशा विविध संवेदनशील विषयांवर तळागाळात जाऊन कार्य केले आहे. यापूर्वी त्याने नवी दिल्ली येथील विज्ञान भवन आणि भारत मंडपम सारख्या प्रतिष्ठित ठिकाणी आपल्या व्याख्यानाद्वारे जळगाव जिल्ह्याचे नाव राष्ट्रीय पातळीवर उंचावले आहे.
सध्या तो स्वतःची सामाजिक संस्था चालवत असून, केंद्रीय युवा मंत्रालयाच्या ‘मेरा युवा भारत’ (MY Bharat) उपक्रमाचा तो सक्रिय स्वयंसेवक म्हणूनही कार्यरत आहे. पुरस्कार स्वीकारल्यानंतर आपली भावना व्यक्त करताना कमलेश म्हणाला की, “शासनाने माझ्या कार्याची दखल घेऊन दिलेला हा पुरस्कार माझ्यासाठी अत्यंत प्रेरणादायी आहे. या सन्मानामुळे सामाजिक जबाबदारी अधिक वाढली असून, भविष्यात अधिक जोमाने आणि व्यापक स्वरूपात समाजकार्य करण्याचा माझा संकल्प आहे.”
कमलेश सोनवणे याच्या या यशाबद्दल पाचोरा शहरासह संपूर्ण जिल्ह्यातून त्याचे कौतुक होत असून, विविध क्षेत्रांतील मान्यवरांकडून त्याच्यावर शुभेच्छांचा वर्षाव होत आहे.
