जळगाव, (प्रतिनिधी) : धरणगाव तालुक्यातील एका गावात १७ वर्षीय अल्पवयीन मुलीवर घरात घुसून अत्याचार केल्याची धक्कादायक घटना उघडकीस आली आहे. पीडितेच्या आईला जीवे मारण्याची धमकी देऊन आणि पीडितेला बेदम मारहाण करून हा गुन्हा करण्यात आला. याप्रकरणी जळगाव एमआयडीसी पोलिसांनी संशयित आरोपीला बेड्या ठोकल्या आहेत.
चोपडा तालुक्यातील पारगाव येथील रहिवासी तेजस गजानन हिरे हा १३ एप्रिल रोजी सकाळी धरणगाव तालुक्यातील एका गावात पीडितेच्या आजीच्या घरात अनधिकृतपणे शिरला. त्याने पीडितेच्या आईला जीवे मारण्याची धमकी दिली. पीडितेने प्रतिकार करण्याचा प्रयत्न केला असता, आरोपीने तिच्या तोंडाला स्कार्फ बांधून लाकडी दांड्याने बेदम मारहाण केली आणि तिच्यावर अत्याचार केला. ही घटना कोणाला सांगितल्यास आईसह तिला ठार मारण्याची धमकी देऊन आरोपी पसार झाला होता.
घटनेनंतर घाबरलेल्या पीडितेने १४ एप्रिल रोजी जळगाव गाठून एमआयडीसी पोलिस ठाण्यात तक्रार दिली. पोलिसांनी तत्परता दाखवत आरोपी तेजस हिरे याच्याविरुद्ध गुन्हा दाखल करून त्याला तातडीने अटक केली आहे. या प्रकरणाचा पुढील तपास सहायक पोलिस निरीक्षक माधुरी बोरसे करत आहेत.
