पुणे, (प्रतिनिधी) : राष्ट्रवादी काँग्रेसचे (शरद पवार गट) अध्यक्ष आणि ज्येष्ठ नेते शरद पवार यांना सोमवारी दुपारी श्वास घेण्यास त्रास जाणवू लागल्याने पुण्यातील रुबी हॉल क्लिनिकमध्ये दाखल करण्यात आले आहे. डॉक्टरांनी त्यांच्या विविध चाचण्या केल्या असून त्यांची प्रकृती सध्या स्थिर असल्याचे सांगण्यात आले आहे.
रुबी हॉल क्लिनिकचे संचालक डॉ. सायमन ग्रॅण्ट यांच्या मार्गदर्शनाखाली तज्ज्ञ डॉक्टरांच्या पथकाने पवार यांची तपासणी केली. याबाबत अधिक माहिती देताना डॉ. अभिजित लोढा म्हणाले की, “शरद पवार यांच्या छातीत थोडा कफ जमा झाल्याने त्यांना श्वसनास त्रास होत होता. त्यांची प्रकृती पूर्णपणे स्थिर असून त्यांना कोणत्याही प्रकारच्या ऑक्सिजन किंवा व्हेंटिलेटरची आवश्यकता नाही.”
डॉक्टरांचे निरीक्षण आणि खबरदारी..
खबरदारीचा उपाय म्हणून शरद पवार यांना सध्या रुग्णालयातील खासगी कक्षात ठेवण्यात आले असून, पुढील २४ तास ते डॉक्टरांच्या निरीक्षणाखाली राहतील. प्रकृतीमध्ये सुधारणा होत असली तरी विश्रांतीची गरज असल्याने त्यांना दाखल करून घेण्यात आले आहे.
कार्यकर्त्यांना आवाहन..
पवार यांना रुग्णालयात दाखल केल्याचे वृत्त समजताच कार्यकर्त्यांमध्ये चिंतेचे वातावरण पसरले होते. मात्र, रुग्णालय प्रशासनाने आणि पक्षाकडून कार्यकर्त्यांना रुग्णालय परिसरात गर्दी न करण्याचे आवाहन करण्यात आले आहे. पवारांची प्रकृती उत्तम असून काळजीचे कोणतेही कारण नसल्याचे डॉक्टरांनी स्पष्ट केले आहे.
