जळगाव, (प्रतिनिधी) : धावत्या रेल्वेमधून प्रवाशांचे सामान लंपास करणाऱ्या सराईत चोरट्यांच्या मुसक्या आवळण्यात जळगाव स्थानिक गुन्हे शाखेला यश आले आहे. झेलम एक्सप्रेसमधून १ लाख ६५ हजार रुपये किमतीचे सोन्या-चांदीचे दागिने चोरणाऱ्या टोळीतील समीर शेख फिरोज उर्फ गोल्डन याला पोलिसांनी अटक केली असून, त्याच्या साथीदाराचा शोध सुरू आहे.
अयोध्या येथील रहिवासी आनंद मोर्या हे ८ फेब्रुवारी २०२६ रोजी झेलम एक्सप्रेसने प्रवास करत होते. जळगाव ते भुसावळ दरम्यान रेल्वे धावत असताना अज्ञात चोरट्याने त्यांची बॅग लंपास केली. या बॅगेत सोन्या-चांदीचे दागिने असा एकूण १ लाख ६५ हजार रुपयांचा मुद्देमाल होता. मोर्या यांनी याप्रकरणी इटारसी रेल्वे पोलीस ठाण्यात ‘शून्य’ क्रमांकाने तक्रार दाखल केली होती, जी पुढील तपासासाठी भुसावळ रेल्वे पोलिसांकडे वर्ग करण्यात आली होती.
या गुन्ह्याचा समांतर तपास स्थानिक गुन्हे शाखेकडून सुरू असताना, जळगावमधील रेकॉर्डवरील गुन्हेगार समीर शेख फिरोज उर्फ गोल्डन (रा. फातेमा नगर) आणि सोनू जयसिंग बागडे (रा. जाखनी नगर) यांनी हा गुन्हा केल्याची खात्रीशीर माहिती वरिष्ठ पोलीस निरीक्षक राहुल गायकवाड यांना मिळाली.
मिळालेल्या माहितीनुसार, पथकाने सापळा रचून फातेमा नगर परिसरातून समीर शेख उर्फ गोल्डन याला ताब्यात घेतले. पोलिसी खाक्या दाखवताच त्याने आपल्या साथीदारासह गुन्ह्याची कबुली दिली. आरोपीला पुढील कारवाईसाठी भुसावळ रेल्वे पोलिसांच्या स्वाधीन करण्यात आले आहे.
ही धडक कारवाई जळगावचे पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या मार्गदर्शनाखाली पार पडली. या पथकात पोलीस उपनिरीक्षक शरद बागल, अंमलदार अतुल वंजारी, अकरम शेख, विजय पाटील, नितीन बाविस्कर, किशोर पाटील आणि रवींद्र कापडणे यांचा समावेश होता.
