जळगाव (प्रतिनिधी) : जळगाव शहर महानगरपालिका निवडणुकीचे बिगुल वाजले असून, महायुतीच्या प्रचाराचा अधिकृत शुभारंभ आज रविवार, ४ जानेवारी रोजी होत आहे. भाजप प्रदेशाध्यक्ष आ. रवींद्र चव्हाण यांच्या हस्ते पिंप्राळा येथील भवानी मंदिर येथे प्रचाराचा नारळ फोडला जाणार असून, त्यानंतर सायंकाळी ५ वाजता छत्रपती शिवाजी महाराज चौक (शिवतीर्थ) येथे महायुतीची प्रचंड जाहीर सभा पार पडणार आहे. या सभेच्या माध्यमातून महायुती निवडणुकीचे रणशिंग फुंकणार आहे.
महानगरपालिकेच्या ७५ ही जागांवर महायुतीने कंबर कसली असून, या शक्तीप्रदर्शनासाठी राज्यातील व जिल्ह्यातील सर्व प्रमुख नेते एकाच मंचावर येणार आहेत. यामध्ये राज्याचे ग्रामविकास मंत्री गिरीश महाजन, पालकमंत्री गुलाबराव पाटील, केंद्रीय मंत्री रक्षा खडसे, माजी मंत्री संजय सावकारे, खा. स्मिता वाघ, माजी मंत्री आ. अनिल पाटील, माजी मंत्री गुलाबराव देवकर, आ. सुरेश भोळे, आ. मंगेश चव्हाण, आ. चंद्रकांत सोनवणे, आ. किशोर पाटील, आ. अमोल जावळे, आ. चंद्रकांत पाटील आणि आ. अमोल पाटील यांच्यासह महायुतीचे सर्व वरिष्ठ पदाधिकारी उपस्थित राहणार आहेत.
प्रचाराचा शुभारंभ पिंप्राळा येथील भवानी माता मंदिरात सायंकाळी ५ वाजता धार्मिक विधी व नारळ फोडून होईल. त्यानंतर सर्व नेत्यांच्या उपस्थितीत शहरातील मुख्य केंद्र असलेल्या छत्रपती शिवाजी महाराज चौकात भव्य जाहीर सभा होईल. या सभेसाठी भाजप जिल्हाध्यक्ष दीपक सूर्यवंशी, शिवसेना जिल्हाप्रमुख विष्णू भंगाळे, राष्ट्रवादी काँग्रेस (अजित पवार गट) जिल्हाध्यक्ष संजय पवार आणि रिपाइं (आठवले गट) जिल्हाध्यक्ष अनिल अडकमोल यांच्यासह महायुतीचे शेकडो पदाधिकारी व कार्यकर्ते तयारीला लागले आहेत.
जळगाव शहराच्या सर्वांगीण विकासाचा संकल्प सोडत महायुतीने या निवडणुकीत पूर्ण ताकदीनिशी उतरण्याचा निर्णय घेतला आहे. या ऐतिहासिक सभेला महायुतीचे सर्व ७५ उमेदवार, पदाधिकारी आणि कार्यकर्त्यांनी मोठ्या संख्येने उपस्थित राहावे, असे आवाहन जिल्हाध्यक्ष दीपक सूर्यवंशी, विष्णू भंगाळे आणि संजय पवार यांनी केले आहे. या सभेकडे संपूर्ण जिल्ह्याचे लक्ष लागले असून, महायुती या माध्यमातून प्रचारात आघाडी घेण्याच्या तयारीत आहे.
