जळगाव, (प्रतिनिधी) : बसमध्ये चढणाऱ्या प्रवाशाच्या खिशातील रोकड लंपास करणाऱ्या तीन पाकीटमारांना एमआयडीसी पोलिसांनी अटक केली आहे. आरोपींकडून चोरीस गेलेली संपूर्ण ₹१५,००० रोख रक्कम हस्तगत करण्यात आली आहे.
मिळालेल्या माहितीनुसार, यावल येथील रहिवासी शेख कलीम शेख इसाक (वय ५०) हे ०१ डिसेंबर रोजी पत्नीच्या औषधोपचारासाठी जळगाव येथील रुग्णालयात आले होते. औषधे घेऊन घरी परतण्यासाठी ते जळगाव शहरातील अजिंठा चौफुली येथून बसमध्ये चढत असताना, त्यांच्या पाठीमागून आलेल्या अनोळखी इसमाने त्यांच्या पॅन्टच्या खिशातील ₹१५,०००/- रोख रक्कम चोरून नेली. याप्रकरणी एमआयडीसी पोलीस ठाण्यात अज्ञात व्यक्तीविरुद्ध गुन्हा दाखल करण्यात आला होता.
या गंभीर घटनेची दखल घेऊन, पोलीस निरीक्षक आव्हाड यांनी एमआयडीसी पोलीस ठाण्यातील गुन्हे शोध पथकाला तात्काळ आरोपींचा शोध घेण्याच्या सूचना दिल्या होत्या. त्यानुसार, पथकातील अंमलदारांनी गुप्त माहिती आणि सीसीटीव्ही फुटेजचे बारकाईने निरीक्षण करून आरोपींची ओळख पटवली. या माहितीच्या आधारावर, रजा कॉलनी परिसरातील रहिवासी असलेले खालील तीन आरोपी निष्पन्न झाले. यात हमीद अय्युब खान (वय २२, रा. बाम्बे बेकरी जवळ, अक्सा नगर, जळगाव), समीर खान अफसर खान (वय २२, रा. शेरा चौक, जळगाव), शोहेब मेहमुद पटेल (वय २३, रा. शेरा चौक, रजा कॉलनी, जळगाव) या तिघांनाही अटक करण्यात आली असून, त्यांनी चोरलेली ₹१५,०००/- रोख रक्कम पोलिसांनी हस्तगत केली आहे.
सदरची कारवाई पोलीस अधीक्षक महेश्वर रेड्डी, अप्पर पोलीस अधीक्षक अशोक नखाते, उप विभागीय पोलीस अधिकारी नितीन गणापुरे, पोलीस निरीक्षक बबन आव्हाड यांच्या मार्गदर्शनाखाली पार पडली. कारवाई पथकात पोउपनि राहुल तायडे, पोउपनि चंद्रकांत धनके, सफौ विजयसिंग पाटील, किरण पाटील, गिरीष पाटील, प्रदिप चौधरी, विशाल कोळी यांचा समावेश होता. पुढील तपास पोहेकॉ गिरीष पाटील हे करीत आहेत.
