फराज अहमद | जामनेर,दि. 23 – जामनेर पहुर रस्त्यावरील नागदेवता मंदीराजवळ आज गुरूवारी भीषण अपघात झाला. अज्ञात वाहनाने दिलेल्या धडकेत टाटा इंडीगो गाडीतील दोन जण जागीच ठार झाले, तर 3 महिला गंभीर जखमी झाल्या. अपघातात एक ६ महिन्यांचे बाळ मात्र सुरक्षीत आहे .
या बाबत प्राथमिक माहीती अशी की भुसावळ येथील रहीवाशी सैंदाने कुटुंब आणि स्नेही हे कुंटाबातील लहान भाऊ यांच्या लग्नकार्या निमित्त MH 18 W 2412 या टाटा इंडिगो गाडीने औरंगाबाद कडे जात होते. दरम्यान जामनेर शहराजवळील नागदेवता मंदीराजवळ त्यांच्या इंडीगो गाडीला अज्ञात वाहनाने जोरदार कट मारल्याने अपघात झाला.
दरम्यान अपघातात पंकज गोविंद सैंदाणे आणि सुजाता प्रविण हिवरे हे जागीच ठार झाले. तर गाडीतील हर्षा पंकज सैंदाणे आणि नेहा राजेश अग्रवाल या गंभीर जखमी झाल्या दोघांवर जामनेर शहरातील ग्लोबल महाराष्ट्र रुग्णालयात उपचार सुरु आहेत. अपघातात गंभीर जखमी झालेल्या प्रतिभा जगदिश सैंदाणे यांना पुढील उपचारार्थ जळगांव येथे हलविण्यात आले असुन अपघातात स्पंदन पंकज सैदाने हे ६ महिन्यांचे बाळ मात्र सुरक्षीत असल्याचे कळते.
अपघातग्रस्त टाटा इंडीगो गाडीला धडक देणाऱ्या अज्ञात वाहनाचा जामनेर पोलीस शोध घेत असुन घटनेचा पुढील तपास करीत आहेत.
