जळगाव, (प्रतिनिधी) : येथील एमआयडीसी पोलीस स्टेशन हद्दीत झालेल्या बॅग लिफ्टिंगच्या गुन्ह्याचा स्थानिक गुन्हे शाखेने छडा लावला असून, ८ लाख रुपये रोख रक्कम हस्तगत केली आहे. दि.१५ नोव्हेंबर रोजी विलास मधुकर जाधव (वय ६७) यांनी दिलेल्या फिर्यादीवरून एमआयडीसी पोलीस स्टेशनमध्ये गुन्हा नोंद करण्यात आला होता.
गुन्ह्याचे गांभीर्य लक्षात घेऊन पोलीस अधीक्षक यांनी स्थानिक गुन्हे शाखेला तपास करण्याचे आदेश दिले होते. वरिष्ठ पोलीस निरीक्षक राहुल गायकवाड यांच्या नेतृत्वाखालील पथकाने तांत्रिक विश्लेषण आणि गोपनीय माहितीच्या आधारे तपास करून २३ नोव्हेंबर रोजी विजय शांताराम पाटील (वय ४१, रा. कलावसंत नगर, जळगाव), जितेंद्र छोटुलाल जाधव (वय ४४, रा. ज्ञानदेव नगर, जळगाव) या दोन आरोपींना ताब्यात घेतले. त्यांच्याकडून हिसकावून नेलेली आठ लाख रुपये रोख रक्कम जप्त करण्यात आली आहे. अटक केलेल्या आरोपींना पुढील तपासासाठी एमआयडीसी पोलीस स्टेशनच्या ताब्यात देण्यात आले असून पुढील तपास सुरू आहे.
ही उल्लेखनीय कामगिरी पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, आणि उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक राहुल गायकवाड, पोउपनि. शरद बागल, सोपान गोरे, पोहेकॉ प्रविण भालेराव, मुरलीधर धनगर, सलीम तडवी, सिध्देश्वर डापकर, रतनहरी गिते, मयुर निकम, सचिन घुगे, प्रदीप सपकाळे, पंकज खडसे, मुबारक देशमुख, कुंदनसिंग बयास गौरव पाटील, मिलींद जाधव तसेच स्थागुशा, नेत्रम आणि सायबर शाखेच्या अधिकारी व अंमलदार यांच्या पथकाने केली.
