जळगाव, (प्रतिनिधी) : रोटरी जळगाव एलिट आणि गोल्डसिटी हॉस्पिटल यांच्या संयुक्त विद्यमाने, दि. ६ आणि ७ डिसेंबर २०२५ रोजी दोन दिवसीय विनामूल्य प्लास्टिक, कॉस्मेटिक व हँड सर्जरी शिबिर आयोजित करण्यात आले आहे. गरजू आणि आर्थिकदृष्ट्या दुर्बळ असलेल्या रुग्णांसाठी हा एक मोठा दिलासा ठरणार आहे. शहरातील गोल्ड सिटी हॉस्पिटल, येथे हे शिबिर आयोजित करण्यात आले आहे.
या शिबिरात प्लास्टिक, कॉस्मेटिक आणि हँड (हाताचे आणि बोटांचे व्यंग) सर्जरी मोफत करण्यात येणार आहेत:
विशेषतः जळालेले व्रण, जन्मतः असलेले हातांचे, पायांचे व शरीरावरील व्यंग, वाकडी कवळी, मार लागून चेहऱ्यावरील वाढलेले व्रण, शस्त्रक्रियेमुळे न झालेले मोठे किंवा विचित्र व्रण, अपघाताने आलेला विकृती व व्यंग आदी व्याधींचे उपचार मोफत करण्यात येणार आहे.
या शिबिरासाठी पुणे व मुंबई येथील आंतरराष्ट्रीय स्तरावर ख्यातीप्राप्त तज्ञ डॉक्टरांची टीम येणार आहे. त्यांनी आतापर्यंत देश-विदेशात अनेक जटिल शस्त्रक्रिया यशस्वीरित्या पूर्ण केल्या आहेत. शिबिरात गरीब रुग्णांना व मुलींना प्राधान्य देण्यात येईल. गरजू रुग्णांनी गोल्ड सिटी हॉस्पिटल येथे वेळेत नाव नोंदणी करून या विनामूल्य शिबिराचा लाभ घ्यावा, असे आवाहन आयोजकांनी केले आहे.
