यावल, (प्रतिनिधी) : रात्रीच्या वेळी महामार्गावर चालकांना अडवून लुटमार करणाऱ्या एका सराईत गुन्हेगारासह त्याच्या साथीदाराला यावल पोलिसांनी अटक केली आहे. आरोपींकडून लुटलेली ५ हजार रुपयांची रक्कमही हस्तगत करण्यात आली आहे.
मिळालेल्या माहितीनुसार, १७ ऑगस्ट रोजी मध्यरात्रीच्या सुमारास रोहित प्रकाश रल (वय २४) हे त्यांच्या महिंद्रा पिकअप गाडीतून रावेर ते चोपडा महामार्गाने जात असताना, यावल शहरातील बुरुज चौकात दोन अनोळखी व्यक्तींनी त्यांचे वाहन थांबवले. आरोपींनी त्यांना मारहाण करून त्यांच्या गाडीच्या डॅशबोर्डमधून ५ हजार रुपये रोख रक्कम आणि महत्त्वाची कागदपत्रे असलेली पिशवी जबरदस्तीने काढून घेतली. या घटनेनंतर रोहित रल यांनी यावल पोलिस ठाण्यात अज्ञात चोरट्यांविरोधात गुन्हा दाखल केला होता.
या गुन्ह्याचे गांभीर्य लक्षात घेऊन, पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी अनिल बडगुजर यांनी गुन्हा लवकर उघडकीस आणण्याच्या सूचना दिल्या होत्या. त्यानुसार, पोलीस निरीक्षक रंगनाथ धारबळे यांच्या नेतृत्वाखाली पोलिसांनी गोपनीय माहिती आणि परिसरातील स्थानिक रहिवाशांच्या चौकशीच्या आधारे तपास सुरू केला.
या तपासात समशेर शहा सलीम शहा (वय २७, रा. बाहेरपुरा, यावल) आणि समीर रहेमान तडवी (वय २२, रा. तडवी कॉलनी, यावल) या दोघांनी हा गुन्हा केल्याचे निष्पन्न झाले. पोलिसांनी आरोपी समशेर शहा याला जळगाव येथील गेंदालाल मिलजवळून, तर समीरला यावलमधून ताब्यात घेऊन अटक केली.
पोलिसांनी या आरोपींकडून लुटलेली ५ हजार रुपयांची रक्कम जप्त केली आहे. अटक करण्यात आलेला आरोपी समशेर शहा सलीम शहा हा एक सराईत गुन्हेगार असून त्याच्यावर यापूर्वी भुसावळ रेल्वे पोलीस स्टेशन आणि भुसावळ बाजारपेठ पोलीस स्टेशनमध्ये चोरी, जबरी चोरी, घरफोडी आणि विनयभंगासह अॅट्रॉसिटी कायद्यांतर्गत अनेक गुन्हे दाखल आहेत.
सदरची यशस्वी कारवाई पोलीस निरीक्षक रंगनाथ धारबळे यांच्या नेतृत्वाखाली स. फौ. विजय पाचपोळे, पोहेकॉ वासुदेव मराठे, पोहेकॉ निलेश चौधरी, पोना अमित तडवी, पोकॉ अर्षद गवळी, पोकॉ ऐजाज गवळी, पोकॉ अनिल साळुंखे आणि पोकॉ सागर कोळी यांच्या पथकाने केली. पुढील तपास पोलीस निरीक्षक रंगनाथ धारबळे करीत आहेत.
