पाचोरा, (प्रतिनिधी) : तालुक्यातील लोहारा येथे चारित्र्याच्या संशयावरून एका पतीने गाढ झोपेत असलेल्या आपल्या पत्नीचा धारदार शस्त्राने वार करून निर्घृण खून केल्याची धक्कादायक घटना मंगळवारी रात्री ११ ते १२ वाजेच्या सुमारास घडली आहे. या प्रकरणी पोलिसांनी तात्काळ कारवाई करत आरोपी पतीला अटक केली असून, पिंपळगाव हरेश्वर पोलीस स्टेशनमध्ये खुनाचा गुन्हा दाखल करण्यात आला आहे.
नितीन दौलत शिंदे (वय ३५, रा. पाचोरा रोड, लोहारा) असे अटक करण्यात आलेल्या आरोपीचे नाव आहे, तर मयत पत्नीचे नाव अर्चना उर्फ कविता नितीन शिंदे (वय ३२) आहे. त्यांच्या पश्चात एक मुलगा आणि एक मुलगी असा परिवार आहे.
मयत अर्चनाचा भाऊ आकाश कडूबा सपकाळ यांनी पोलिसांना दिलेल्या माहितीनुसार, नितीन शिंदे आणि त्याच्या कुटुंबीयांकडून अर्चनाचा अनेक दिवसांपासून मानसिक आणि शारीरिक छळ सुरू होता. नितीन तिच्या चारित्र्यावर संशय घेत होता. तसेच, घर बांधण्यासाठी तिच्या माहेरच्या लोकांकडून १० लाख रुपये आणण्यासाठीही तिचा छळ केला जात होता. मंगळवारी मध्यरात्री अर्चना गाढ झोपेत असताना, नितीनने धारदार शस्त्राने तिच्यावर वार करून तिची हत्या केली.
या घटनेमुळे परिसरात एकच खळबळ उडाली आहे. घटनेची माहिती मिळताच पोलीस उपअधीक्षक अरुण आव्हाड आणि स.पो.नि. कल्याणी वर्मा यांच्यासह पोलीस यंत्रणेने घटनास्थळी धाव घेतली आणि आरोपी नितीन शिंदेला ताब्यात घेतले. पुढील तपास पोलीस करत आहेत. जिल्ह्यात अशाप्रकारे सतत घडणाऱ्या खुनाच्या घटनांमुळे समाजमन सुन्न झाले आहे.
