चोपडा, (प्रतिनिधी) : चोपडा शहरातील बँक ऑफ इंडियाच्या शाखेसमोरून एका ६४ वर्षीय वृद्धाच्या पिशवीतून ५० हजार रुपये चोरी झाल्याची धक्कादायक घटना समोर आली आहे. मधुकर पंढरीनाथ पाटील (रा. त्र्यंबक नगर, चोपडा) असे या वृद्ध व्यक्तीचे नाव असून, त्यांनी दिलेल्या फिर्यादीनुसार, ही चोरी बँकेतच आर.डी. चलन भरत असताना घडली.
मिळालेल्या माहितीनुसार, मधुकर पाटील यांनी बँक ऑफ इंडियाच्या एम.जी. कॉलेजसमोर असलेल्या शाखेतून ८० हजार रुपये रोख काढले होते. हे पैसे त्यांनी एका प्लास्टिकच्या पिशवीत ठेवले. बँकेतील चलन काउंटरवर ते आर.डी. चलन भरत असताना, सीसीटीव्ही फुटेजमध्ये दिसणाऱ्या अंदाजे ३० ते ३५ वयोगटातील तीन अनोळखी महिलांनी संगनमताने त्यांच्या हातातील प्लास्टिक पिशवी अर्धवट कापली. त्या पिशवीतील ८० हजार रुपयांपैकी ५० हजार रुपयांचे (५०० रुपयांच्या नोटांचे बंडल) लंपास केले.
या प्रकरणी चोपडा शहर पोलीस ठाण्यात तीन अज्ञात महिलांविरुद्ध गुन्हा दाखल करण्यात आला आहे. पोलीस निरीक्षक मधुकर साळवे यांच्या मार्गदर्शनाखाली हवालदार हर्षल पाटील या घटनेचा पुढील तपास करत आहेत. भरदिवसा घडलेल्या या चोरीमुळे परिसरात खळबळ उडाली असून, नागरिकांमध्ये भीतीचे वातावरण आहे.
