जळगाव, (प्रतिनिधी) : चोपडा तालुक्यातील अनवर्दे खुर्द येथे शेतातील कडब्याला भीषण आग लागून या आगीत शेतकऱ्याचा होरपळून मृत्यू झाल्याची हृदयद्रावक घटना शनिवारी दि.१७ रोजी दुपारी उघडकीस आली. याप्रकरणी संबंधित पोलीस स्टेशनला घटनेची नोंद घेण्याचे काम सुरु होते.
पंडित डोमन रायसिंग (वय ६५) असे मयत शेतकऱ्याचे नाव आहे. त्यांच्या पश्चात पत्नी, मुलगा व दोन मुली असा परिवार आहे. शेतकरी पंडित रायसिंग हे शनिवारी सकाळी आपल्या शेतात मशागत करण्यासाठी गेले होते. त्याचवेळी शेतातील कडब्याला अचानक आग लागली. ते धुराच्या व आगीच्या तडाख्यात सापडल्याने होरपळून जमिनीवर कोसळले. त्यातच त्यांचा मृत्यू झाल्याचा अंदाज आहे.
पंडित हे दुपारपर्यंत घरी आले नाहीत. त्यामुळे घरातील मुले त्यांना बघायला शेतात गेली असता ते जळालेल्या व मयत स्थितीत आढळून आले. या घटनेची माहिती मिळताच भाऊबंदांनी शेताकडे धाव घेत मृतदेह घरी आणला. याप्रकरणी संबंधित पोलीस स्टेशनला घटनेची नोंद घेण्याचे काम सुरु होते.
