जळगाव, (प्रतिनिधी) : बोदवड तालुक्यातील मुक्तळ येथील शेतमजुराने शेतातच विष घेऊन आत्महत्या करण्याचा प्रयत्न केला होता. उपचारादरम्यान त्याचा जळगावात मृत्यू झाला आहे. घटनेची शनिपेठ पोलीस स्टेशनला प्राथमिक अकस्मात मृत्यूची नोंद करण्यात आली आहे.
अनिल नाना पाटील (वय ३८, रा. मुक्तळ ता. बोदवड) असे मयत तरुणाचे नाव आहे. त्यांच्या पश्चात आई, वडील, बहीण असा परिवार आहे. गावात शेतमजुरी करून ते परिवाराचा उदरनिर्वाह करीत होते. दरम्यान, अनिल पाटील हे शेतात असताना बुधवारी दि. १४ रोजी त्यांनी सकाळी काहीतरी विषारी औषध प्राशन करून आत्महत्या करण्याचा प्रयत्न केला. ग्रामस्थांच्या लक्षात येताच त्यांनी अनिल पाटील यांना शासकीय वैद्यकीय महाविद्यालय व रुग्णालय, जळगाव येथे उपचारासाठी दाखल केले.
रुग्णालयात उपचार सुरु असताना अनिल पाटील यांचा गुरुवारी दि. १५ मे रोजी संध्याकाळी साडेपाच वाजता मृत्यू झाला आहे. यामुळे कुटुंबासह मुक्तळ गावावर शोककळा पसरली आहे. घटनेची शनिपेठ पोलीस स्टेशनला प्राथमिक अकस्मात मृत्यूची नोंद करण्यात आली आहे.
