चोपडा, (प्रतिनिधी) : तालुक्यातील मामलदे येथे मंगळवारी १३ मे रोजी दुपारच्या सुमारास घरात काम करताना दुर्घटना होऊन ३५ वर्षीय महिलेचा विजेचा धक्का लागून मृत्यू झाला. चोपडा शहर पोलीस स्टेशन येथे अकस्मात मृत्यूची नोंद करण्यात आली आहे.
अनिता अनिल पाटील (वय ३५) असे मृत महिलेचे नाव आहे. त्यांच्या पश्चात पती आणि इतर कुटुंबीय आहेत. अनिता पाटील या त्यांच्या कुटुंबासोबत गावात राहत होत्या. मंगळवारी दुपारच्या सुमारास त्या आपल्या घरी दैनंदिन कामे करत असताना अचानक त्यांना विजेचा जोरदार धक्का बसला. या दुर्घटनेत त्या गंभीररित्या जखमी झाल्या आणि जागीच बेशुद्ध पडल्या.
घटनेची माहिती मिळताच परिसरातील नागरिक आणि नातेवाईकांनी तातडीने धाव घेत अनिता यांना उपचारासाठी चोपडा येथील उपजिल्हा रुग्णालयात दाखल केले. मात्र, रुग्णालयातील वैद्यकीय अधिकाऱ्यांनी तपासणीअंती त्यांना मृत घोषित केले. अनिता पाटील यांच्या मृत्यूमुळे कुटुंबीयांना मोठा धक्का बसला आहे. या घटनेची नोंद चोपडा शहर पोलीस ठाण्यात अकस्मात मृत्यू म्हणून करण्यात आली आहे.
