जळगाव, (प्रतिनिधी) : जळगाव शहरातील सुपुत्री डॉ. शरयू जितेंद्र विसपुते (बामणोदकर) यांनी दिल्ली येथे झालेल्या दुसऱ्या एशियन योगासन चॅम्पियनशिपमध्ये सुवर्ण पदक पटकावून जळगाव शहराचा, महाराष्ट्र राज्याचा आणि भारत देशाचा मान अभिमानाने उंचावला आहे. या स्पर्धेत २१ देशांतील स्पर्धकांमधून शरयू विसपुते यांनी प्रथम क्रमांक पटकावला असून, योगासारख्या जागतिक स्तरावरील कलेमध्ये भारताचे नेतृत्व केले आहे.
डॉ. शरयू यांना महाराष्ट्र सुवर्णकार सेना, जिल्हा जळगाव आणि ऋणानुबंध वधु-वर पालक परिचय मेळावा समिती, जळगाव यांच्या वतीने सन्मानित करण्यात आले. त्यांच्या या ऐतिहासिक विजयाबद्दल समाजबांधवांकडून त्यांचे अभिनंदन करण्यात येत आहे. “जिथे स्वप्नांना बळ असतं, तिथे यशाला मर्यादा नसते,” हे डॉ. शरयूंच्या जीवनातून अधोरेखित होते. गेल्या वर्षी त्यांनी जयपूर येथील राष्ट्रीय स्पर्धेतही सुवर्ण पदक मिळवले होते.
या गौरवप्रसंगी महाराष्ट्र सुवर्णकार सेना, जिल्हा जळगावचे अध्यक्ष संजय विसपुते यांनी डॉ. शरयू यांना पुढील वाटचालीसाठी शुभेच्छा दिल्या. यावेळी उपस्थित पदाधिकाऱ्यांमध्ये संजय पगार, भगवान दुसाने, इच्छाराम दाभाडे, सुभाष सोनार, आर. डी. विसपुते, जितेंद्र विसपुते, प्रशांत विसपुते यांचा समावेश होता.
