जळगाव, (प्रतिनिधी) : धुळे जिल्ह्यातील फागणे येथील शालकाची विम्याची रक्कम हडप करण्यासाठी शेवगे ता. पारोळा येथील मेव्हण्याने एकाच्या मदतीने शालकाचा अपघात झाल्याचा बनाव करून खून केल्याची घटना उघडकीस आली. दोन्ही आरोपींना अटक करण्यात आली असून न्यायालयाने ३ तारखेपर्यंत पोलिस कोठडी सुनावली आहे.
धुळे जिल्ह्यातील फागणे येथील समाधान शिवाजी पाटील याचा अपघाती मृत्यू झाल्याप्रकरणी दि. १९ एप्रिल रोजी पारोळा पोलिस स्टेशन येथे अकस्मात मृत्यू दाखल करण्यात आला होता. डीवायएसपी विनायक कोते, पोलीस निरीक्षक सुनील पवार यांच्या मार्गदर्शनाखाली पोलिस उपनिरीक्षक अमरसिंग विसावे, पोहेकॉ सुनील हटकर, संजय पाटील, अनिल राठोड, अभिजीत पाटील यांनी सखोल तपास केला. यात काहीतरी वेगळे असल्याचं जाणवले.
यात मयताचा मेव्हणा संदीप भालचंद्र पाटील (वय ४०, रा.शेवगे ता.पारोळा) तसेच चंद्रदीप आधार पाटील (वय ४५, रा.खवशी ता.अमळनेर) यांनी कट रचून शालक समाधान पाटील याचा खून केल्याचे उघडकीस आले आहे. संदीप पाटील याने शालक समाधान पाटील याच्या नावावर विमा पॉलिसी काढून ठेवल्याचे उघडकीस आले. तसेच अपघातात वापरलेली स्कुटी (एम एच ५४ ए ९५१३) ही देखील पूर्णपणे इन्शुरन्स काढलेली होती. समाधानचा खून करून त्याची विमा पॉलिसीची रक्कम व दुचाकीची विम्याची रक्कम आपल्याला मिळावी या हव्यासापोटी समाधानचा खून केल्याचे उघडकीस आले आहे.
पोलिसांनी दोघा आरोपीना अमळनेर तालुक्यातून अटक केली आहे. पोलिसांनी कसून चौकशी केली असता समाधान याला संदीप व चंद्रदीप यांनी धुळे ते जळगाव जाणाऱ्या रस्त्याच्या कडेला घेऊन जाऊन अंधारात लोखंडी रॉडने मारहाण करून शालक समाधान यास जीवे ठार केल्याची कबुली दोघी आरोपींनी दिली आहे. पुढील तपास डीवायएसपी विनायक कोते करीत आहेत.
