सावदा, (प्रतिनिधी) : रावेर तालुक्यातील खिरोदा-पाल घाटात रविवारी भीषण अपघाताने खळबळ उडाली आहे. दि.२७ रोजी रात्री ८:३० वाजता अज्ञात चारचाकी मालवाहू वाहनाने (एमएच २८-१३१४) ने दुचाकी क्र. (एमपी ०९ एक्स ७७७९) ला जोरदार धडक दिल्याने भीषण अपघात झाला. या हृदयद्रावक घटनेत पिता-पुत्राचा जागीच मृत्यू झाला, तर आई आणि तिचा लहान मुलगा गंभीर जखमी झाल्याची घटना घडली.
पिंट्या मोहन भिलाला (वय ३५) आणि त्यांचा ४ वर्षांचा चिमुकला रितिक पिंट्या भिलाला, (रा. पाल, ता. रावेर) यांचा या अपघातात करुण अंत झाला. पिंट्या यांची पत्नी पूजा (वय ३०) आणि त्यांचा २ वर्षांचा मुलगा रोशन यांना डोक्याला गंभीर दुखापत झाली आहे. अपघातानंतर चारचाकी वाहनाचा चालक घटनास्थळावरून फरार झाला. सावदा पोलीस स्टेशनचे सहाय्यक पोलीस निरीक्षक विशाल पाटील यांच्या मार्गदर्शनाखाली रात्री उशिरापर्यंत गुन्हा दाखल करण्याचे काम सुरू होते.
