जळगाव, (प्रतिनिधी) : शहरातील सुप्रीम कॉलनी येथील १६ वर्षीय अल्पवयीन तरुणीने गळफास घेऊन आत्महत्या केल्याची धक्कादायक घटना शुक्रवारी उघडकीस आली. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
सपना विजय तायडे (वय १६, रा. सुप्रीम कॉलनी, जळगाव) असे मयत तरुणीचे नाव आहे. ती आई, वडील, लहान भाऊ यांच्यासोबत राहत होती. सपनाचे वडील विजय हे एका कंपनीत कामगार आहेत. दरम्यान, शुक्रवारी सपना हिने राहत्या घरी गळफास घेऊन आत्महत्या केली. कुटुंबियांच्या लक्षात येताच त्यांनी शासकीय वैद्यकीय महाविद्यालय व रुग्णालयात दाखल केले असता वैद्यकीय अधिकाऱ्यांनी तपासून मयत घोषित केले.
यावेळी कुटुंबीयांनी मन हेलावणारा आक्रोश केला. सपना हिने नुकतीच इयत्ता दहावीची परीक्षा दिली होती. सपनाच्या मृत्यूमुळे कुटुंबियांना धक्का बसला आहे. याप्रकरणी एमआयडीसी पोलीस स्टेशनला अकस्मात मृत्यूची नोंद करण्यात आली आहे.
