जळगाव, (प्रतिनिधी) : शहरातील पिंप्राळा भागात सेंट्रल बँक कॉलनी येथून एका मजुराच्या घरातून मुलीच्या लग्नासाठी खरेदी केलेले दागिने व काही रोख रक्कम अज्ञात चोरट्यांनी चोरून नेल्याची घटना दिनांक ७ एप्रिल रोजी समोर आली आहे. या प्रकरणी रामानंदनगर पोलिस ठाण्यात चोरट्यांविरुद्ध गुन्हा दाखल करण्यात आला आहे.
संजय सुकदेव भोई (वय ५४) यांनी दिनांक १९ व २० एप्रिल रोजी मुलीचे लग्न असल्यामुळे काही सोन्याचे दागिने घेतले होते. तसेच काही दिवसांपुर्वी ते परिवारासह मुलीच्या लग्नासाठी साड्या व कपडे घ्यायला सुरत येथे गेले होते. सोमवारी घरी परतल्यानंतर दरवाज्याचे कुलूप तोडल्याचे समोर दिसले.
तसेच घरात पोहचल्यानंतर घरातून २० हजार रुपये किंमतीचा सोन्याची लगड, १० हजार रुपयांचे ६ भार वजनाच्या चांदीच्या साखळ्या असा एकूण ३० हजार रुपयांचा ऐवज चोरट्यांनी चोरुन नेल्याचे समोर आले. या प्रकरणी सोमवारी सायंकाळी संजय भोई यांच्या फिर्यादीवरुन अज्ञात चोरट्यांविरुद्ध रामानंदनगर पोलिस ठाण्यात गुन्हा दाखल करण्यात आला आहे.
