शेंदुर्णी, (प्रतिनिधी) : खान्देशचे प्रति पंढरपुर नगरी असलेल्या शेंदुर्णी येथील थोर भगवत् भक्त, खान्देशातील विख्यात संतकवी भीमराव मामा पारळकर यांच्या प्रेरणेने व गोविंदराव पारळकर यांच्या अथक परिश्रमाने, ग्रामस्थांच्या सहकार्याने श्रीराम जन्मोत्सव सोहळा यंदाही मोठ्या उत्साहात साजरा करण्यात येत असुन यंदाचे उत्सवाचे हे १०४ वे वर्ष आहे. चै.शु.प्रतिपदा दि.३० मार्च २०२५ रविवार ते चै.शु.अष्टमी दि.५ एप्रिल २०२५ शनिवार पावेतो दररोज रात्री ८-३० वाजता धार्मिक कार्यक्रम होतील.
महाराष्ट्रातील सुप्रसिद्ध कीर्तनकार,किर्तनभुषण ह.भ.प. स्नेहलताई पित्रे (डोंबिवली -मुंबई) यांचे सुश्राव्य कीर्तन श्रीराम मंदिराच्या समोर आयोजित करण्यात आले. त्यांना हार्मोनियम वरदुर्गा मुंडले (कुडाळ) तर तबल्यावर लव आडसुळ (सांगली) हे साथसंगत करणार आहे.चै.शु.नवमी ६ एप्रिल रविवारी सकाळी १० वाजता संतश्रेष्ठ कडोजी महाराज संस्थानचे गादीवारस हभप शांताराम महाराज भगत यांचे पारंपरिक श्रीराम जन्मोत्सवाचे कीर्तन होणार आहे. यासाठी हभप वारकरी संप्रदाय भजनी मंडळ, शेंदुर्णी यांची साथसंगत लाभणार आहे.
दुपारी १२ वाजता श्रीराम जन्मोत्सव सोहळा व प्रसादाचे वितरण करण्यात येईल. रात्री ८ वाजता श्रीची शहरातुन सवाद्य पालखी मिरवणुक काढली जाणार असून यात हभप वारकरी संप्रदाय भजनी मंडळ व हरिपाठ महिला भजनी मंडळ शेंदुर्णी, ग्रामस्थ मंडळी यांचा सहभाग राहणार आहे. तरी सर्व भाविक सज्जनांनी या श्रीराम जन्मोत्सव सोहळ्यात सहभागी होऊन उदारतेने आर्थिक सहकार्य करावे अशी विनंती चालक श्रीरामचंद्र देवस्थान, शेंदुर्णी यांनी केली आहे.
