जळगाव, (प्रतिनिधी) : जामनेर शहरातील एका ४० वर्षीय महिलेचा स्वयंपाक करताना आग लागून जळाल्यामुळे प्रकृती गंभीर होऊन उपचारादरम्यान मृत्यू झाल्याची घटना मंगळवारी दि. १८ मार्च रोजी मध्यरात्री साडे बारा वाजेच्या सुमारास घडली आहे. रामानंद नगर पोलीस स्टेशनला प्राथमिक अकस्मात मृत्यूची नोंद करण्यात आली आहे.
मंगला सुनील लोंढे (वय ४०, रा.बिस्मिल्ला नगर, जुना बोदवड रोड, जामनेर) असे मयत महिलेचे नाव आहे. त्यांच्या पश्चात पती, ३ मुले, ३ मुली असा परिवार आहे. त्यांचे पती पशुपालन व्यवसाय करून परिवाराचा उदरनिर्वाह करतात. गुरुवारी दि. ६ मार्च रोजी रात्री ९ वाजेच्या सुमारास घरी गॅस शेगडीवर स्वयंपाक करीत असताना अचानक आग लागल्याने महिलेच्या साडीने पेट घेतला. त्यात महिला गंभीर जखमी झाली.
कुटुंबीयांनी सुरुवातीला जामनेर येथील ग्रामीण रुग्णालयात व नंतर जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल केले होते. तेथे १२ दिवस मंगला यांची मृत्यूशी झुंज सुरु होती. अखेर उपचारादरम्यान मंगळवारी दि. १८ रोजी मध्यरात्री साडेबारा वाजेच्या सुमारास प्राणज्योत मालविली. यावेळी कुटुंबीयांनी एकच आक्रोश केला. महिलेच्या मृत्यूमुळे जामनेर शहरात शोककळा पसरली आहे. रामानंद नगर पोलीस स्टेशनला प्राथमिक अकस्मात मृत्यूची नोंद करण्यात आली आहे.
