जळगाव, (प्रतिनिधी) : यावल तालुक्यातील शेतकऱ्याने स्वतःच्या शेतात विषारी औषध घेऊन आत्महत्या करण्याचा प्रयत्न केला होता. उपचारदरम्यान शेतकऱ्याचा रविवारी मृत्यू झाला आहे. यावल पोलीस स्टेशनला अकस्मात मृत्यूची नोंद घेण्याचे काम सुरू होते.
दौलत देवराम पाटील (वय ५७, रा. थोरगव्हाण ता. यावल) असे मयत शेतकऱ्याचे नाव आहे. ते गावात पत्नी, दोन मुले, एक मुलगी यांच्यासह राहत होते. शेती काम करून परिवाराचा उदरनिर्वाह करीत होते. दरम्यान गुरुवारी दि. ६ मार्च रोजी संध्याकाळी ते शेतात असताना त्यांनी विषारी औषध घेऊन आत्महत्या करण्याचा प्रयत्न केला होता.
कुटुंबीयांनी त्यांना उपचारासाठी शासकीय वैद्यकीय महाविद्यालय व रुग्णालय, जळगाव येथे दाखल केले होते. त्यांच्यावर उपचार सुरू असताना रविवारी दि. ९ मार्च रोजी ३ दिवसांनी त्यांची प्राणज्योत मालवली. यावेळी कुटुंबीयांनी आक्रोश केला. घटनेप्रकरणी यावल पोलीस स्टेशनला अकस्मात मृत्यूची नोंद करण्याचे काम सुरू होते. शेतकऱ्याच्या मृत्यूमुळे थोरगव्हाण गावामध्ये शोककळा पसरली आहे.
