बुलडाणा, (प्रतिनिधी) : राज्याचे उपमुख्यमंत्री एकनाथ शिंदे यांच्या वाहनाला बॉम्बने उडवून देण्याची धमकी मिळाल्यानंतर पोलिसांनी सखोल तपास करून मुंबई गुन्हे शाखा आणि बुलडाणा पोलिसांच्या संयुक्त पथकाने तपासादरम्यान, बुलडाणा जिल्ह्यातील देऊळगाव मही गावातून दोघे तरुणांना अटक केली आहे. सध्या पोलिसांनी त्यांना मुंबईकडे रवाना केले आहे. याप्रकरणी गोरेगाव पोलीस ठाण्यात गुन्हा दाखल करण्यात आला आहे.
मंगेश अच्युतराव वायाळ (वय-३५) आणि अभय गजानन शिंगणे (वय-२२) असे अटकेतील दोघांचे नाव आहे. गुरुवारी उपमुख्यमंत्री एकनाथ शिंदे यांच्या वाहनाला बॉम्बनं उडवण्याची धमकी गोरेगाव पोलीस ठाण्यात ई-मेलद्वारे देण्यात आली होती. या धक्कादायक घटनेमुळे पोलिसांनी तातडीने गुन्हा दाखल करून तपास सुरू केला. मुंबई पोलिसांच्या सायबर विभागाने ई-मेलचा स्रोत शोधून काढला आणि संबंधित आयपी अॅड्रेसच्या मदतीने आरोपींच्या ठिकाणाचा शोध घेतला. या तपासादरम्यान, मुंबई आणि बुलडाणा पोलिसांच्या संयुक्त पथकाने देऊळगाव मही गावात छापा टाकून दोघांना अटक केली.
संशयित मंगेश वायाळ हा ट्रक चालक असून अभय शिंगणे हा मोबाईल शॉपी चालवतो. विशेष म्हणजे, हे दोघेही नात्याने आतेभाऊ-मामेभाऊ आहेत. पोलिसांनी केलेल्या प्राथमिक चौकशीत असे दिसून आले की, आरोपींना दारूचे व्यसन असून अभय शिंगणेच्या मोबाईल शॉपीमधूनच हा धमकीचा ई-मेल पाठवण्यात आला होता. तपास यंत्रणांनी दोघांनाही ताब्यात घेऊन त्यांना चौकशीसाठी मुंबईला नेले आहे. गुरुवारी सकाळी गोरेगाव पोलीस ठाण्यात उपमुख्यमंत्री एकनाथ शिंदे यांच्या वाहनाला बॉम्बनं उडवून देण्याची धमकी असलेला ई-मेल आला. यानंतर पोलिसांनी तत्काळ तपास सुरू केला. ही धमकी केवळ गोरेगावच नव्हे, तर मुंबईतील इतर पोलीस ठाण्यांनाही पाठवण्यात आली होती. ई-मेलमध्ये उपमुख्यमंत्र्यांच्या वाहनावर हल्ला करण्याचा स्पष्ट उल्लेख होता. यावरून पोलीस अधिक सतर्क झाले आणि गुन्हा दाखल करत तपासयंत्रणांनी आरोपींना शोधण्यास सुरुवात केली.
