जळगाव, (प्रतिनिधी) : भरारी फाउंडेशनतर्फे २३ ते २७ जानेवारी दरम्यान बहिणाबाई महोत्सवाचे आयोजन शहरातील सागर पार्क मैदानावर होणार आहे. यंदा महोत्सवाचे १० वे वर्ष असून २३ जानेवारीस सायंकाळी सहाला अपर पोलीस महासंचालक कारागृह व सुधारसेवा डॉ. जालिंदर सुपेकर यांच्या हस्ते उद्घाटन होणार आहे.
उद्घाटन समारंभासाठी खा. स्मिता वाघ,आ. सुरेश भोळे, आ. मंगेश चव्हाण, जिल्हा नियोजन अधिकारी विजय शिंदे, नाबार्डचे चे जिल्हा व्यवस्थापक अमित तायडे, भालचंद्र पाटील, उद्योगपती रजनीकांत कोठारी, डॉ.पी. आर. चौधरी, बाळासाहेब सुर्यवंशी आदींची उपस्थिती राहणार आहे.
यंदाच्या महोत्सवाचे आकर्षण म्हणजे खानदेशातील पर्यटन स्थळांच्या माहितीचे दालन, तसेच वाचन संस्कृती जोपासण्याच्या दृष्टीने भव्य पुस्तकाच्या प्रतिकृतीचे प्रवेशद्वार साकारण्यात आले आहे.
असे आहेत कार्यक्रम..
२३ जानेवारीला ‘भारुडं प्रबोधन, शालेय सांस्कृतिक कार्यक्रम, जागर लोककलेचा तसेच विद्यार्थ्यांसाठी चित्रकला स्पर्धेचे आयोजन करण्यात आले आहे. त्याचबरोबर २४ जानेवारीला अभिनेत्री श्रेया बुबडे व अभिनेते कुशल बद्रीके यांचा ‘चला हवा करुया’ तर २५ जानेवारीला ‘सप्तरंगी रे’ हे शास्त्रीय नृत्याचे सादरीकरण, मराठी संस्कृतीचा फॅशन शो, २६ जानेवारीला शाहीर मीरा दळवी यांचा लावणी महाराष्ट्राची, २७ जानेवारीला शाहीर सुमित दळवी यांचा ‘शाहीर हा महाराष्ट्राचा प्राण’ असे सांस्कृतिक कार्यक्रम होतील.
महोत्सवात विविध खाद्यपदार्थांची मेजवानी जळगावकर नागरिकांना चाखता येणार आहे. त्यामुळे या पाच दिवसीय बहिणाबाई महोत्सवाला जळगावकर नागरिकांनी भरभरून प्रतिसाद देत महोत्सवात सांस्कृतिक कार्यक्रमांचा तसेच विविध खाद्यपदार्थांचा आनंद घ्यावा, असे आवाहन आयोजकांतर्फे करण्यात आले आहे.
