अमळनेर, (प्रतिनिधी) : तहसील कार्यालयासमोरून दुचाकी चोरणाऱ्या संशयित आरोपीला अमळनेर पोलिसांनी शिरपूर येथून अटक केली असून त्याच्याजवळून तीन दुचाकी हस्तगत केल्या आहेत. दरम्यान त्याच्याकडून आणखी अनेक चोऱ्या उघडकिस येण्याची शक्यता आहे.
विधानसभा निवडणूक काळात माजी आमदार शिरीष चौधरी यांचा उमेदवारी अर्ज भरताना झालेल्या गर्दीचा गैरफायदा घेत शिरपूर येथील संतोष विठ्ठल हटकर (वय ३४, रा क्रांतीनगर शिरपूर) याने एक दुचाकी चोरली होती. पोलीस निरीक्षक विकास देवरे यांनी विविध रस्त्यांचे सीसीटीव्ही कॅमेरे तपासले असता त्यांना संशयित आरोपी आढळून आला. त्याचा शोध घेण्यासाठी त्यांनी तपासाधिकारी हेडकॉन्स्टेबल अशोक साळुंखे, मिलिंद सोनार, निलेश मोरे, प्रशांत पाटील, उज्वल म्हस्के, विनोद संदानशीव यांच्या पथकाला रवाना केले.
संतोष हटकर याच्याविरुद्ध शिरपूर पोलीस स्टेशनला गुन्हे दाखल असल्याने तांत्रिक मुद्द्यांच्या आधारे त्याची ओळख पटली. पोलिसांनी त्याला त्याच्या घरून अटक केली. अमळनेर पोलीस स्टेशनला आल्यावर त्याला पोलिसी खाक्या दाखवताच त्याने अमळनेर येथून चोरलेली मोटरसायकलसह बाहेरगावाहून चोरलेल्या दोन दुचाकी काढून दिल्या. पोलिसांनी त्या जप्त केल्या आहेत.
