जळगाव, (प्रतिनिधी) : जळगाव, (प्रतिनिधी) : शहरातील वाघ नगर स्टॉपजवळ दुचाकीवरुन आलेल्या टोळक्याने तरुणाला मारहाण केल्याची घटना मंगळवारी रात्री १० वाजेच्या सुमारास घडली. दरम्यान, जुन्या वादातून हा गोळीबार झाल्याचा अंदाज असून दोन दुचाकींची दगड टाकून तोडफोड करण्यात आली आहे. घटनेमुळे परिसरात रात्री तणावाचे वातावरण निर्माण झाले. रामानंदनगर पोलीस स्टेशनचे कर्मचारी तपास करीत आहेत.
शहरातील वाघ नगर स्टॉप परिसरात चेतन सीताराम तायडे (वय-२६ रा.समता नगर) आणि अक्षय सुरेश लोखंडे (वय-२१ रा.समता नगर, जळगाव) हे दोन तरुण दुचाकी लावून उभे होते. दरम्यान, रात्री १० वाजेच्या सुमारास आठ ते दहा जणांचे टोळके त्याठिकाणी आले. त्यांनी दुचाकीजवळ उभ्या असलेल्या तरुणांना मारहाण करण्यास सुरुवात केली.
टोळक्याने केलेल्या हल्ल्यात अक्षय लोखंडे या तरुणाच्या डोक्यात धारदार शस्त्राने वार करण्यात आला असून तो जखमी झाला आहे. हल्ल्यानंतर टोळक्याने त्या तरुणांच्या दुचाकींची तोडफोड करण्यास सुरुवात केली. यावेळी काही जणांनी तेथील दगड उचलून दुचाकीवर टाकून त्यांचे नुकसान झाले. यामध्ये दुचाकी क्रमांक एमएच.१९.बीडी.८६२४ व एमएच.१९.ईडी.८८७९ क्रमांकाच्या दुचाकींचे नुकसान झाले आहे. या घटनमुळे परिसरात खळबळ उडाली आहे. दरम्यान, वाद पूर्ववैमनस्यातून झाला असल्याची माहिती मिळत आहे.
घटनेची माहिती मिळताच रामानंदनगर पोलीस स्टेशनच्या कर्मचाऱ्यांनी घटनास्थळी धाव घेतली. तसेच जखमी चेतन तायडे व अक्षय लोखंडे यांना शासकीय वैद्यकीय महाविद्यालय व रुग्णालयात दाखल करण्यात आले. त्या ठिकाणी उपचार सुरू आहेत. दरम्यान रुग्णालयात देखील अनेक तरुणांनी गर्दी केली होती.
