जळगाव, (प्रतिनिधी) : आपण सुरक्षितपणे सुखाची दिवाळी साजरी करत असताना, देशाच्या रक्षणार्थ छातीवर गोळी झेलत बलिदान देणाऱ्या जळगाव जिल्ह्यातील शहीद सैनिकांच्या परिवारासोबत रोटरी क्लब ऑफ जळगाव वेस्टच्या सदस्यांनी दिवाळीचा आनंद साजरा केला. मायादेवी नगरातील रोटरी भवन येथे झालेल्या या भावस्पर्शी कार्यक्रमास लेफ्टनंट कर्नल अश्विन वैद्य, आर्या फाउंडेशनचे डॉ.धर्मेंद्र पाटील, रोटरीचे डीजीएन डॉ. राजेश पाटील यांची प्रमुख उपस्थिती होती. तर व्यासपीठावर अध्यक्ष विनीत जोशी, प्रकल्प सचिव तुषार तोतला, प्रशासकीय सचिव भद्रेश शाह, प्रकल्प प्रमुख महेश कापुरे उपस्थित होते.
या कार्यक्रमात शहीद सैनिकांच्या वीर माता, वीर पत्नी व वीर पिता यांचा दिवाळी भेटवस्तू देऊन सत्कार करण्यात आला. शहिदांच्या वीरमाता पत्नी यांनी मान्यवरांसह रोटरी वेस्टच्या पदाधिकाऱ्यांना औक्षण करून भाऊबीज साजरी केली. सैनिकांना सरावा दरम्यानच राष्ट्र सर्व प्रथम हे शिकवले जाते. सैनिक कुटुंबीयांच्या पाठिंब्याशिवाय देशकार्य करू शकत नाही. त्यामुळे सैनिकांचे बलिदान व त्यांच्या कुटुंबीयांचे योगदान याची तुलना कशाशीच होऊ शकत नाही. जळगावकर नागरिक सकारात्मक असून, रोटरी वेस्टच्या या उपक्रमामुळे ते संवेदनशील असल्याचेही दिसून आले असे प्रतिपादन लेफ्टनंट कर्नल आश्विन वैद्य यांनी केले.
डीजीएन डॉ.राजेश पाटील यांनी रोटरीची माहिती देत मनोगत व्यक्त केले. प्रास्ताविक तुषार तोतला यांनी तर सूत्रसंचालन महेश कापुरे यांनी केले. आभार नितीन रेदासनी यांनी मानले.
