बांभोरी येथील दुर्दैवी घटना
धरणगाव (वृत्तसंस्था ) ;-सोमवारी जिल्ह्यात ठिकठकाणी कानबाईचे विसर्जन सुरु असतांना विहिरीत डोकावून बघतांना एका २३ वर्षीय तरुणाचा तोल जाऊन तो विहिरीत पडून त्याचा मृत्यू झाल्याची घटना धरणगाव तालुक्यातील बांभोरी येथे सकाळी उघडकीस आली. मयूर राजेंद्र पाटील वय-२३, रा. बांभोरी ता. धरणगाव असे मयत झालेल्या तरुणाचे नाव आहे. धरणगाव पोलिसात अकस्मात मृत्यूची नोंद करण्यात आली आहे.
बांभोरी येथे कानबाई विसर्जन मिरवणूक सोमवारी १२ ऑगस्ट रोजी सकाळी वाजत गाजत निघाली होती. या मिरवणुकीत मयूर पाटील सहभागी झाला होता. बांभोरी गावाजवळ असणाऱ्या एका विहिरीत गावातील लोक हे कानबाई पाण्यात विसर्जन सुरु असतांना मयूर पाटील हा विहिरीच्या काठाजवळ उभा होता. तो विहिरीत डोकावून पाहत असतांना त्यावेळी त्याचा अचानक पाय घसरला आणि तो पाण्यात पडला.
दरम्यान तेथील नागरिकांनी त्याला तातडीने बाहेर काढले व धरणगाव येथील ग्रामीण रुग्णालयात दाखल करण्यात आले असता वैद्यकीय अधिकारी यांनी तपासणी केल्यानंतर मयत घोषित केले. याप्रकरणी धरणगाव पोलिसात अकस्मात मृत्यूची नोंद करण्यात आली आहे. तपास पोलीस हेडकॉन्स्टेबल प्रमोद पाटील हे करीत आहे.
