गजानन पाटील | अमळनेर, दि. ३१- पांझरा नदीवरील बाह्मणे गावाजवळील फुटलेला साठवण बंधारा दुरुस्तीच्या प्रतीक्षेत असताना आमदार अनिल पाटील यांच्या प्रयत्नातून बंधाऱ्याच्या दुरुस्तीसाठी प्रशासकीय मान्यता मिळाली आहे. सुमारे ३ कोटी १ लक्ष,५८ हजार ७५०/-रुपये निधीतून या बंधाऱ्याची दुरुस्ती होणार आहे.
याबाबत प्रशासकीय मान्यतेचे आदेश महाराष्ट्र शासनाच्या मृदू व जलसंधारण विभागाने ८ मार्च रोजी काढले असून यात धुळे जिल्ह्यातील योजनांच्या दुरुस्तीच्या अंदाज पत्रकाना प्रशासकीय मान्यता देण्यात आली आहे. तसेच अमळनेर तालुक्यातील बाह्मणे गावाजवळील साठवण बंधाऱ्याचा देखील यात समावेश आहे. तालुक्यातील बाम्हणे, कळंबु, एकलहरे, व परिसरातील ६ ते ८ गावाचा सिंचन व पाण्याचा प्रश्न या बंधाऱ्यावर अवलंबून आहे. मात्र पांझरा नदीला २०१८ मध्ये आलेल्या महापुरामुळे हा बंधारा फुटला.
या बंधाऱ्याच्या दुरुस्तीसाठी पांझरा परिसरातील शेतकऱ्यांनी आमदार पाटील यांच्याकडे सतत पाठपुरावा करीत होते. दरम्यान आमदारांनी बाम्हणे ग्रामस्थांना एक महिन्याच्या आत बंधाऱ्यासाठी निधी मंजूर करणार असल्याचा शब्द दिला होता. त्याप्रमाणे आमदारांनी तो शब्द पूर्ण करून दाखविल्याने पांझरा काठच्या गावांना मोठा दिलासा मिळाला आहे. यामुळे अनेक गावांच्या
पाणीपुरवठ्याचा प्रश्न मिटून शेती सिंचनाचा देखील विशेष फायदा होणार आहे. यामुळे सर्वत्र आमदारांचे कौतुक होत आहे. आमदारांनी देखील महाविकास आघाडी शासन व जलसंधारण मंत्र्यांचे विशेष आभार व्यक्त केले.
