जळगाव, प्रतिनिधी : जळगाव जिल्हा मध्यवर्ती सहकारी बँकेच्या निवडणुकीत अर्ज माघारीच्या अंतिम दिवसानंतर राजकीय चित्र स्पष्ट झाले आहे. महायुतीने २१ पैकी तब्बल १२ जागांवर बिनविरोध विजय मिळवत निवडणुकीत आघाडी घेतली आहे. यामध्ये शिवसेना शिंदे गटाचे सर्वाधिक सहा, भाजपचे चार आणि राष्ट्रवादी काँग्रेस अजित पवार गटाचे दोन उमेदवार बिनविरोध निवडून आले आहेत. त्यामुळे जिल्हा बँकेवर वर्चस्व मिळविण्याच्या महायुतीच्या प्रयत्नांना मोठे यश मिळाल्याचे मानले जात आहे.

जिल्हा बँकेची निवडणूक ही केवळ सहकार क्षेत्रापुरती मर्यादित नसून जिल्ह्यातील ग्रामीण राजकारण, सहकारी संस्थांवरील वर्चस्व आणि स्थानिक नेतृत्वाच्या दृष्टीने अत्यंत महत्त्वाची मानली जाते. त्यामुळे या निवडणुकीकडे संपूर्ण जिल्ह्याचे लक्ष लागले होते. महायुतीतील घटक पक्षांनी जागावाटप आणि उमेदवार निवडीबाबत समन्वय साधल्याने १२ जागांवर बिनविरोध निवडीचा मार्ग मोकळा झाला.

शिवसेना शिंदे गटाने सहा जागांवर बाजी मारली आहे. यामध्ये पालकमंत्री गुलाबराव पाटील, आमदार चंद्रकांत सोनवणे, सुमित किशोर पाटील, मृणाल अमोल पाटील, नलिनी चिमणराव पाटील आणि सोमसिंग खुमानसिंग पाटील यांचा समावेश आहे. शिंदे गटाच्या सहा उमेदवारांची बिनविरोध निवड झाल्याने जिल्हा बँकेतील पक्षाचे प्रतिनिधित्व भक्कम झाले आहे.
भारतीय जनता पार्टीनेही चार जागांवर बिनविरोध विजय मिळविला आहे. यामध्ये मंत्री गिरीश महाजन, रोहित निकम, मधुकर राणे आणि रजनी सावकारे यांचा समावेश आहे. या निवडीमुळे जिल्हा बँकेत भाजपचेही महत्त्वपूर्ण प्रतिनिधित्व निश्चित झाले आहे.
राष्ट्रवादी काँग्रेसच्या अजित पवार गटाच्या वाट्याला दोन जागा आल्या आहेत. या दोन्ही जागांवर सोनल संजय पवार आणि जयश्री अनिल पाटील यांची बिनविरोध निवड झाली आहे. त्यामुळे महायुतीतील तिन्ही घटक पक्षांना जिल्हा बँकेत प्रतिनिधित्व मिळाले आहे.
२१ पैकी १२ जागांवर बिनविरोध निवडी झाल्यानंतर आता उर्वरित नऊ जागांवरील निवडणूक महत्त्वाची ठरणार आहे. या जागांवर कोण बाजी मारणार, कोणत्या गटाचे पारडे जड ठरणार आणि मतदानानंतर जिल्हा बँकेच्या सत्तेचे अंतिम समीकरण कसे तयार होणार, याकडे राजकीय वर्तुळाचे लक्ष लागले आहे.
एकीकडे महायुतीने १२ जागांवर बिनविरोध निवडी मिळवत आघाडी घेतली असली, तरी उर्वरित नऊ जागांचा निकाल जिल्हा बँकेतील सत्तेचे अंतिम चित्र ठरविणार आहे.








