जळगाव, प्रतिनिधी : शहरात मोटार सायकल चोरीच्या वाढत्या घटनांना आळा घालण्यात एमआयडीसी पोलिसांना मोठे यश आले आहे. जळगावमधील तांबापुरा आणि रामनगर परिसरातून दुचाकी लांबवणाऱ्या एका सराईत चोरट्याला गुन्हे शोध पथकाने शिताफीने ताब्यात घेतले असून, त्याच्याकडून चोरीला गेलेल्या दोन मोटारसायकल हस्तगत करण्यात आल्या आहेत.
मिळालेल्या माहितीनुसार, १४ ऑक्टोबर रोजी रात्रीच्या सुमारास तांबापुरा येथील अजमेरी गल्लीतून ३५ हजार रुपये किमतीची मोटारसायकल आणि रामनगरमधील डी मार्ट समोरील परिसरामनून ५० हजार रुपये किमतीची मोटारसायकल अशी एकूण ८५ हजार रुपये किमतीची वाहने चोरट्यांनी लांबवली होती. या प्रकरणी एमआयडीसी पोलीस ठाण्यात गुन्हे दाखल करण्यात आले होते.
गुन्ह्याचे गांभीर्य लक्षात घेऊन पोलीस निरीक्षक बबन आव्हाड यांनी गुन्हे शोध पथकाला तपासाच्या सूचना दिल्या होत्या. पथकातील अधिकारी व अंमलदारांनी तांत्रिक विश्लेषण आणि गोपनीय बातमीदारांच्या मदतीने तपास चक्रे वेगाने फिरवून सोनू उर्फ साहिल मोहम्मद तडवी (वय २३, रा. मच्छी बाजार, जळगाव) या संशयित आरोपीस ताब्यात घेतले. कसून चौकशी केली असता त्याने दोन्ही गुन्ह्यांची कबुली दिली आणि त्याच्याकडून चोरीला गेलेला संपूर्ण मुद्देमाल जप्त करण्यात आला.
सदर यशस्वी कारवाई जळगावचे पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि पोलीस निरीक्षक बबन आव्हाड यांच्या मार्गदर्शनाखाली पोलीस उपनिरीक्षक चंद्रकांत धनके, पो.उप.नि. विजयसंग पाटील, पो.हे.कॉ. रामकृष्ण पाटील, गिरीश पाटील, मोतीलाल बोरसे, किरण पाटील, शशिकांत मराठे, रमाकांत साळुंखे आणि गणेश ठाकरे यांच्या पथकाने पार पाडली. गुन्ह्याचा पुढील तपास पोलीस अंमलदार करीत आहेत.
