जळगाव, प्रतिनिधी : क्रीडा व युवक सेवा संचालनालय (महाराष्ट्र राज्य, पुणे) आणि जिल्हा क्रीडा कार्यालय, जळगाव यांच्या संयुक्त विद्यमाने राबवल्या जाणाऱ्या ‘मिशन लक्षवेध’ योजने अंतर्गत जिल्हा क्रीडा प्रतिभा विकास केंद्रातील ॲथलेटिक्स खेळाडूंशी जळगाव शहर महानगरपालिकेचे उपमहापौर तथा विद्यापीठ खेळाडू मनोज चौधरी यांनी संवाद साधला. छत्रपती श्री शिवाजी महाराज जिल्हा क्रीडा संकुल येथे पार पडलेल्या या कार्यक्रमात उपमहापौर चौधरी यांनी खेळाडूंच्या अडचणी जाणून घेत त्यांना क्रीडा क्षेत्रातील भवितव्याबाबत मार्गदर्शन केले.
या प्रसंगी जिल्हा क्रीडा अधिकारी दिलीप दिघे, महाराष्ट्र राज्य ॲथलेटिक्स असोसिएशनचे उपाध्यक्ष राजेश जाधव, क्रीडा अधिकारी सचिन निकम, जळगाव जिल्हा ॲथलेटिक्स असोसिएशनचे मुख्य प्रशिक्षक व नायब तहसीलदार अनिल पठाडे, राष्ट्रीय खेळाडू संजय मोती, तसेच मिशन लक्षवेध केंद्राचे मुख्य प्रशिक्षक दशरथ जाधव, मनिष भंडारी व सुधाकर सपकाळे यांची प्रमुख उपस्थिती होती.
कार्यक्रमादरम्यान उपमहापौर मनोज चौधरी यांच्यासह जिल्हा क्रीडा अधिकारी दिलीप दिघे, राजेश जाधव आणि सचिन निकम यांनी उपस्थितांना संबोधित करत खेळाडूंना कठोर परिश्रम, शिस्त आणि सातत्याच्या जोरावर राष्ट्रीय व आंतरराष्ट्रीय स्तरावर यश संपादन करण्याचे आवाहन केले. या भेटीमुळे केंद्रातील ॲथलेटिक्स खेळाडूंमध्ये नवा उत्साह पाहायला मिळाला.
