जळगाव | प्रतिनिधी : महाराष्ट्र राज्य सफाई कर्मचारी आयोगाचे उपाध्यक्ष मुकेश सोनु सारवान हे मंगळवार, १५ सप्टेंबर रोजी जळगाव जिल्ह्याच्या दौऱ्यावर येत आहेत. त्यांच्या जिल्हा परिषद भेटीदरम्यान सफाई कर्मचाऱ्यांच्या विविध प्रश्नांवर आढावा बैठक आयोजित करण्यात आली आहे.
मंगळवारी दुपारी १ वाजता जिल्हा परिषद कार्यालयात मुख्य कार्यकारी अधिकारी करिश्मा नायर यांच्या उपस्थितीत ही बैठक होणार आहे. शासन निर्णयानुसार जिल्ह्यातील सफाई कर्मचाऱ्यांशी संबंधित विविध बाबींचा यावेळी आढावा घेण्यात येणार आहे.
जळगाव जिल्ह्यातील सर्व पंचायत समित्या, प्राथमिक आरोग्य केंद्रे, ग्रामीण रुग्णालये तसेच जिल्हा परिषद मुख्यालयातील वारसा हक्काच्या प्रलंबित प्रकरणांची माहिती बैठकीत तपासण्यात येणार आहे. तसेच सफाई कर्मचाऱ्यांची मंजूर पदे, भरलेली पदे आणि रिक्त पदांची सद्यस्थिती जाणून घेतली जाणार आहे.
याशिवाय सफाई कर्मचाऱ्यांच्या प्रलंबित मागण्यांबाबतही सविस्तर आढावा घेऊन त्यावर आवश्यक कार्यवाहीच्या दृष्टीने चर्चा करण्यात येणार आहे. बैठक सफाई कर्मचाऱ्यांच्या विविध प्रश्नांच्या निराकरणासाठी महत्त्वपूर्ण ठरणार आहे.
