जळगाव, प्रतिनिधी : जिल्हा पोलिस दलातील प्रशासकीय कामकाजाला गती देण्यासाठी पोलिस अधीक्षक श्रीकांत धिवरे यांनी तीन पोलिस निरीक्षकांच्या नवीन नियुक्त्यांचे आदेश काढले आहेत. ६ सप्टेंबर रोजी जारी करण्यात आलेल्या या आदेशानुसार जामनेर आणि जिल्हापेठ पोलिस ठाण्यांसह आर्थिक गुन्हे शाखेच्या प्रभारी अधिकाऱ्यांमध्ये बदल करण्यात आला आहे.
महाराष्ट्र पोलिस अधिनियमातील तरतुदींनुसार सक्षम प्राधिकाऱ्यांच्या अधिकाराचा वापर करून या नियुक्त्या करण्यात आल्या आहेत. रायगड येथून हजर झाल्यानंतर पोलिस निरीक्षक निवृत्ती भिमराव बो-हाडे यांची जामनेर पोलिस ठाण्याच्या प्रभारीपदी नियुक्ती करण्यात आली आहे.
भंडारा येथून हजर झाल्यानंतर पोलिस निरीक्षक शरद उत्तमराव शेवाळे यांच्याकडे जिल्हापेठ पोलिस ठाण्याच्या प्रभारीपदाची जबाबदारी सोपविण्यात आली आहे. तर पोलिस निरीक्षक नितीन सुदाम पाटील यांची आर्थिक गुन्हे शाखा, जळगावच्या प्रभारीपदी नियुक्ती करण्यात आली आहे.
नवीन नियुक्ती झालेल्या अधिकाऱ्यांनी त्यांच्या नियुक्तीच्या ठिकाणी तात्काळ हजर होऊन कर्तव्य बजावावे तसेच त्याबाबतचा अनुपालन अहवाल सादर करावा, असे आदेशात नमूद करण्यात आले आहे. या प्रशासकीय फेरबदलामुळे जिल्ह्यातील दोन महत्त्वाच्या पोलिस ठाण्यांसह आर्थिक गुन्हे शाखेच्या कामकाजात बदल झाला आहे.
