जळगाव, (प्रतिनिधी) : आषाढी एकादशीच्या पावन पर्वानिमित्त श्रीराम मंदिर संस्थान, जुने जळगाव यांच्या वतीने आयोजित श्री संत मुक्ताबाई राम पालखी सोहळा जळगाव ते पंढरपूर व पंढरपूर ते जळगाव असा सुमारे ५४ दिवसांचा ११०० किलोमीटरचा पदयात्रा सोहळा भक्तिमय वातावरणात सुरू आहे. ह.भ.प. मंगेश महाराज जोशी यांच्या मार्गदर्शनाखाली सुमारे ३०० वारकरी भक्त या पालखी सोहळ्यात सहभागी झाले आहेत.
या पवित्र वारीदरम्यान कंदर येथे मेहरूनचे माजी नगरसेवक प्रशांत नाईक, सुनील वंजारी, नामदेव नाईक आणि विलास घुगे यांनी ह.भ.प. मंगेश महाराज जोशी यांची सदिच्छा भेट घेतली. यावेळी महाराजांनी सर्वांची प्रेमपूर्वक विचारपूस करून आशीर्वाद दिला तसेच वारकरी संप्रदायातील भक्ती, सेवा आणि समाजप्रबोधनाचे महत्त्व सांगितले. उपस्थितांनीही महाराजांशी स्नेहपूर्ण संवाद साधत त्यांच्या मार्गदर्शनाचा लाभ घेतला.
या अविस्मरणीय भेटीमुळे मेहरूनच्या ग्रामस्थांना पूज्य महाराजांचे दर्शन व आशीर्वाद लाभल्याची भावना व्यक्त करण्यात आली. श्री विठ्ठल-रुक्मिणी चरणी प्रार्थना करत ह.भ.प. मंगेश महाराज जोशी यांना उत्तम आरोग्य, दीर्घायुष्य लाभावे तसेच त्यांच्या मार्गदर्शनाखाली धर्म, संस्कृती आणि वारकरी परंपरेची सेवा अधिकाधिक वृद्धिंगत होत राहावी, अशी प्रार्थना उपस्थितांनी केली.
