जळगाव, (प्रतिनिधी) : जिल्ह्यात अवैध धंद्यांविरोधात सुरू असलेल्या विशेष मोहिमेत स्थानिक गुन्हे शाखेने मुक्ताईनगर रस्त्यावर सापळा रचून तब्बल १२ लाख ०६ हजार १०८ रुपये किमतीचा मुद्देमाल जप्त केला आहे. यामध्ये महाराष्ट्रात प्रतिबंधित असलेला ३,८६,१०८ रुपयांचा गुटखा, ८ लाख रुपयांची अर्टिगा कार (क्र. MH-30 AZ-4664) आणि २० हजार रुपयांचे दोन मोबाईल फोन हस्तगत करण्यात आले आहेत.
गोपनीय माहितीच्या आधारे स्थानिक गुन्हे शाखेच्या पथकाने ही कारवाई केली. या प्रकरणी पोलिसांनी सैय्यद आरिफ सैय्यद हकीम (वय ३५) आणि खलील उल्ला खान (वय ३२, दोघे रा. खामगाव, जि. बुलढाणा) यांना ताब्यात घेतले असून पुढील तपासासाठी त्यांना मुक्ताईनगर पोलिसांच्या स्वाधीन केले आहे.
पोलीस अधीक्षक श्रीकांत धिवरे यांच्या मार्गदर्शनाखाली ही यशस्वी कामगिरी झाली असून, जिल्ह्यात अवैध गुटखा विक्री व वाहतुकीविरोधात कारवाई आणखी तीव्र केली जाईल, असा इशारा त्यांनी दिला आहे. तसेच अंमली पदार्थमुक्त समाज घडवण्यासाठी नागरिकांनी पोलिसांना सहकार्य करावे, असे आवाहनही त्यांनी केले आहे.
