जळगाव, (प्रतिनिधी) : जिल्हा अधीक्षक, भूमि अभिलेख कार्यालयातील लोकसेवक (भुकरमापक) जितेंद्र प्रकाश पाटील (वय ४५, रा. भूषण कॉलनी, जळगाव) याला तक्रारदाराकडून १५ हजार रुपयांची लाच स्वीकारताना लाचलुचपत प्रतिबंधक विभागाने बुधवारी (१ जुलै) रंगेहाथ अटक केली. या कारवाईमुळे शासकीय वर्तुळात प्रचंड खळबळ उडाली असून, आरोपीविरुद्ध जिल्हापेठ पोलीस ठाण्यात गुन्हा दाखल करण्याचे कामकाज सुरू होते.
मिळालेल्या माहितीनुसार, तक्रारदार यांच्या जळगाव शहरातील वडिलापार्जित घराच्या कागदपत्रांमध्ये फेरफार केली होती. या विरोधात जिल्हा अधीक्षक, भूमि अभिलेख कार्यालय, जळगाव येथे अपील केले असता, उतारा अद्यावत करण्यासाठी तक्रारदाराने अर्ज केला होता. परंतु, यावर कोणतीही कारवाई न झाल्याने तक्रारदाराने १८ जून २०२६ रोजी कार्यालयात चौकशी केली.
त्यावेळी भुकरमापक जितेंद्र पाटील याने हे काम करून देण्यासाठी साहेबांसाठी १०,००० रुपये आणि स्वतःसाठी ५,००० रुपये अशा एकूण १५,००० रुपयांच्या लाचेची मागणी केली. लाच देण्याची इच्छा नसल्याने तक्रारदाराने २५ जून २०२६ रोजी एसीबी जळगाव कार्यालयाकडे तक्रार नोंदवली. एसीबीच्या पथकाने लाचेच्या मागणीची पडताळणी केली असता, पाटील याने पंचांसमक्ष लाच मागितल्याचे निष्पन्न झाले. त्यानुसार भूमि अभिलेख कार्यालयात सापळा रचून तक्रारदाराकडून १५,००० रुपयांची लाचेची रक्कम स्वीकारताना जितेंद्र पाटील याला रंगेहाथ पकडण्यात आले.
ही यशस्वी कारवाई ला.प्र.वि. नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक प्रदीप मैराळे, कविता फडतरे यांच्या मार्गदर्शनाखाली पर्यवेक्षण अधिकारी तथा पोलीस उप अधीक्षक योगेश ठाकूर, सापळा अधिकारी पोलीस निरीक्षक रेश्मा अवतारे, पोलीस निरीक्षक हेमंत नागरे आणि सापळा पथकातील अंमलदार सुरेश पाटील, संगीता पवार, राकेश दुसाने, प्रदीप पोळ व मनोज पाटील यांच्या पथकाने केली.
